Por Xurxo Salgado | Conmpostela | 29/12/2015 | Actualizada ás 13:00
O diñeiro público de todos os galegos non para de fluír cara a empresas de comunicación privadas. E é que a Secretaría Xeral de Medios acaba de dar publicidade aos convenios de colaboración subscritos no segundo cuadrimestre do ano 2015 con Editorial Compostela, editora de El Correo Gallego, e co Grupo Voz. En total, a Xunta deulle directamente a estes grupos mediáticos 370.000 euros.
Pero o que chama a atención é que a maior parte desta axuda , 235.000 euros, é para a “difusión informativa da potencialidade de Santiago de Compostela” nos medios destes dous grupos; Radio Voz, La Voz de Galicia e voz.es e en El Correo Gallego, Radio Obradoiro e elcorreogallego.es. É dicir, para falar ben de Santiago aos cidadáns de Santiago e comarca.
Unha subvención que chega xustamente despois de que o PP perdera o goberno da cidade e logo da entrada de Compostela Aberta no consistorio. Este novo goberno mantén pechadas todas as vías de subvención a El Correo Gallego polo enfrontamento que existe entre o alcalde e a súa corporación coa dirección deste medio. Tamén restrinxiu, en parte, as axudas ao Grupo Voz.
Así, destas novas axudas, o Grupo Voz leva 225.000 euros; 125.000 euros para falar da potencialidade de Santiago aos propios santiagueses e 120.000 euros para a “divulgación de información relacionada coa investigación, desenvolvemento e innovación (I+D+I) en Galicia. Pola súa banda, o Grupo El Correo recibe 115.000 euros para falar das virtudes da capital galega.
Estas novas subvencións coñécense un día despois de que GC publicara que tamén a Secretaría Xeral de Medios destinou directamente case 1,7 millóns de euros durante o 2015 en concepto de Axudas. Destes, case a metade, 709.891 euros foron para o Grupo Voz; La Voz de Galicia, S.A. (681.901,96) e Voz de Galicia Radio, S.L.U (27.990,08). Editorial Compostela recibiu 90.086,01 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.