Por Gc Tendencias | Viana do Bolo | 14/01/2016 | Actualizada ás 18:21
A provincia de Ourense convertirase o vindeiro fin de semana no centro do Entroido tradicional do Estado cunha xuntanza de mascaradas de diversos puntos de Galicia e doutras autonomías do noroeste peninsular. Será no marco da II mascarada Ibérica que se celebrará en Viana do Bolo.
O entroido galego ten acadado unha notoriedade extraordinaria fora de Galicia, protagonizando nos dous últimos anos algunha das mais importantes exposicións e ciclos de actividades relacionadas que se teñen dado en lugares do vello continente como o MuCEM, Museo das Civilizacións de Europa e do Mediterráneo, sito en Marsella ou o Museo da Mascara da cidade belga de Binche.
Sen embargo, este evento non conta con axudas oficiais e está impulsado pola Sociedade Antropolóxica Galega (Saga). “Os folións e entroidos galegos non atoparon, en Galicia, interlocutores oficiais que comprendesen a importancia e conveniencia de estar presentes como cultura diferenciada e activa, aló onde paradoxalmente estaba sendo reclamada a intervención galega como un elemento fundamental para a comprensión da realidade cutural do todos os europeos”, apunta o secretario desta entidade, Miguel Losada.
Con esta II Mascarada ibérica, preténdese crear un espazo de encontro - aberto ó público - para as persoas e comunidades que manteñen vivo o pulo dunha das mais senlleiras manifestacións culturais que inda poden ser vividas no vello continente. “É un verdadeiro foro ou seminario práctico do que significa o entroido, e que ó revés do que adoita ser, está deseñado para o intercambio de ideas, experiencias e realidades”, engade Losada.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.