Por Xurxo Salgado | Compostela | 28/01/2016 | Actualizada ás 14:44
As autonómicas galegas están chamando xa a porta e os nervios en certas formacións políticas, tamén. O presidente da Xunta, Alberto Núñez Feijóo, alertou que o voto a Ciudadanos é un voto que acabará nas mareas e en Podemos e, polo tanto, provocará que estas formacións cheguen á Presidencia da Xunta.
Na rolda de prensa posterior ao Consello da Xunta puxo como exemplo o acontecido nas pasadas eleccións xerais nas que o PPdeG, dixo, perdeu catro escanos por mor dos votos a C's. “Só hai que ver o que pasou nas pasadas eleccións cando o voto a Ciudadanos supuxo que o PPdeG perdera catro escanos e esta formación só conseguiu un deputado”, suliñou. “Ese voto acabou nas mareas e en Podemos”, insistiu.
Por iso, volveu facer un chamamento ao voto útil e insinuou que nos próximos comicios só vai haber dúas opcións; ou o PPdeG ou as mareas. “O PP gañará as eleccións se a xente segue confiando no PP e, senón, gobernará a alternativa que é Podemos”, indicou.
Neste sentido, e preguntado por GC, evitou valorar a fichaxe do ex concelleiro popular en Santiago, Javier Sánchez-Agostino como coordinador de C's en Galicia, e se este nomeamento suporá un acercamento entre a formación de Albert Rivera e os populares despois das autonómicas se o PPdeG non consegue a maioría absoluta.
Feijóo descartou da carreira electoral en Galicia ao PSdeG e volveu criticar ao seu secretario xeral, José Ramón Besteiro, de quen dixo que ostentou cargos públicos –en alusión á Presidencia da Deputación de Lugo-- “sen ter gañado ningunhas eleccións”. “Teño máis interese polo que di Felipe González –que aposta por un pacto PSOE-PP --, que polo que di Besteiro”, dixo ao referirse as declaracións do líder dos socialistas galegos que avogou públicamente por un pacto PSOE-Podemos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.