Ana Luisa Bouza: “O ciclo do BNG rematou”

Ana Luisa Bouza acaba de despedirse de anos de militancia no BNG. Anos nos que chegou a confiar en que esta formación podía funcionar como motor dun cambio en Galicia. Eran os anos de Quintana como vicepresidente da Xunta, cando o nacionalismo chegou ao Goberno galego e comezou a facer política de país.

Pero algúns erros propios e, sobre todo, campañas políticas e mediaticas, evitaron que ese cambio do nacionalismo collera forma. Desde entón, os golpes para o Bloque son constantes. Aquel cambio xa non existe e hai outros cambios, aos que a dirección do BNG actual non se quere sumar ou, sinxelamente, non quere ver.

Por iso, quen foi directora xeral do Servizo Galego da Igualdade nesa Xunta e unha das voces diferentes que aínda quedan nun case que monocolor BNG,  Ana Luisa Bouza, acaba de deixar o barco. E sae antes de que se celebre a Asemblea prevista para febreiro porque cre que as cousas non van cambiar.

“É un proceso que ven de longo, que ven de discrepancias sobre a dirección que está tomando o BNG, que empeorou co proceso de Iniciativa pola Unión, e que agora se colma cos resultados do 20D e a postura oficial que segue mantendo o BNG”, explica a Galicia Confidencial.

“Non confío xa que o BNG cambie”, apunta quen leva anos militando nunha minoría dentro do Bloque con voz pero sen voto. “É certo que sempre que estás na oposición dentro dunha organización tes esperanzas de que as túas posicións cheguen, finalmente, a triunfar, pero cando vez que non chegan, pois hai un punto no que te preguntas que fas aquí”, engade.

Por iso, ten claro que, cando non se está de acordo coas posturas oficiais que ano tras ano acaban impoñéndose, “ non vas dar unha batalla porque ves que non hai posibilidades”. “É mellor retirarse”, suliña, porque creo xa que “o ciclo do BNG rematou”.

En todo caso, ten claro que non vai deixar o seu activismo político. “O mundo nacionalista fora do BNG é moi amplo”, indica. “Nós tentámolo con Somos Nós –o grupo impulsado por Anxo Quintana e no que participan persoas de diversas sensibilidades nacionalistas--. Segue parecéndome un bo proxecto, pero quedou limitado ao papel the think thank”, explica.

Somós Nós

Con todo, e aínda que suliña unha e outra vez, que Somos Nós  fai “política pero é apartidario”, non descarta que acabe converténdose noutra cousa. “Hai unha idea clara de non querer ser outra vaca no millo”, di, pero tamén deixa claro que “nestes tempos políticos tan revoltos pois poñer a man no lume, non a poño, aínda que non está nas perspectivas”, argumenta sobre que este proxecto acabe derivando nunha nova forza política.

Ana Luisa Bouza tomou a decisión de xeito individual. Aínda que forma parte de Avrente, a minoría de Máis Galiza que decidiu quedar no Bloque, entende que non merecía a pena agardar. “Os procesos colectivos de marcha remataron. Non hai colectivos cohesiondados xa dentro do BNG, só a UPG e o MGS –unha excisión da primeira pero que apoia a súa orientación política—“.

“O resto da xente pode agruparse de xeito estable pero non para tomar decisións colectivas. Non o hai e, polo tanto, as decisións de marchar son individuais”, di sobre a súa decisión, que tomou de xeito individual. E é que hai outros compañeiros de Abrente que non descartan deixar a organización logo da asemblea de febreiro, precisamente, polo seu inmobilismo. “Cando non tes ningunha confianza dentro e non es útil, pois acabas sendo como unha lousa”, di. “E Quintana, cres que vai marchar?”, preguntámoslle. “Non o sei, iso mellor pregúntallelo a el”, conclúe.