Por Galicia Confidencial | Compostela | 02/02/2016 | Actualizada ás 11:34
Hai uns días, o Goberno da Xunta sacaba peito cos datos da EPA que apuntaban a que Galicia rematara o 2015 con 41.100 persoas menos na lista do paro. Pero, unha vez máis, os datos do Ministerio de Emprego, sobre o número de desempregados no pasado mes de xaneiro volve deixar datos negativos para o país. Creceu un 3,34% , o que supón 7.639 persoas máis sen traballo.
Por provincias, o paro descendeu no dato interanual en todas elas, rexistrándose a maior baixada A Coruña, respecto de xaneiro de 2015, cun -9,37%; seguida de Pontevedra (-8,57%), Lugo (-8,54%) e Ourense (-6,97%).
Tamén aumentou no conxunto do Estado en 57.247 persoas e, sobre todo, entre os empregados procedentes do sector servizos (en 67.129 persoas), seguidos da agricultura (en 3.905); e reduciuse entre os da construción (en 4.821) e a industria (en 475). Así mesmo, o paro diminuíu entre o colectivo sen emprego anterior, en 8.491 persoas.
Sen embargo, e a pesar das cifras, a Xunta preferiu tirar dos datos acumulados e destacou que, con respecto a xaneiro de 2015, hai 22.555 persoas desempregadas menos. Así, a secretaria xeral de Emprego, Covadonga Toca, insistiu en que Galicia mantén unha boa evolución interanual.
Sobre o novo aumento das cifras do paro destacou que foron debidas á finalización da campaña do Nadal, pero non tivo en conta que o pasado mes tamén comenzou a época de rebaixas, na que se soen contratar a máis persoas.
A responsable da Xunta suliñou que nos últimos dous anos conseguíronse subidas porcentuais inferiores ás do comezo da crise, o que evidencia que "estamos no camiño da recuperación económica".
Na evolución dos contratos, Galicia pechou xaneiro de 2016 cun 0,43% máis que hai un ano e, con respecto ás afiliacións, estas aumentaron nun 1,92% en comparación a hai un ano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.