Por gcdeportes | A Coruña | 03/02/2016 | Actualizada ás 11:58
Contan quen o viron xogar que xa de infantil apuntaba maneiras. Das escolas Luis Calvo de Carballo ao Dépor, e da canteira do equipo coruñés, con tan só 15 anos, ao Manchester City. Agora, tres anos e medio despois de emigrar ao fútbol inglés, aínda con 19, Angeliño (Ángel Esmorís Tasende, 4 de xaneiro de 1997) subiu un penúltimo chanzo na súa carreira: debutou co primeiro equipo na FA Cup, o torneo máis antigo do mundo, da man de Manuel Pellegrini. E o vindeiro ano, o lateral esquerdo galego atoparase con Pep Guardiola no ManCity.
“Estiven moito tempo agardando por este intre. Estou moi feliz de debutar no primeiro equipo, un obxectivo que tiven sempre”, dixo a CityTV o galego. Angeliño debutou o sábado no mítico Villa Park de Birminghan fronte ao Aston Villa. O de Coristanco saltou ao campo no minuto 79, cando os citizens xa gañaban 0-4, resultado final, cun hat-trick do nixeriano Kelechi e no campo coincidiu co español Jesús Navas.
Para a súa estrea na Premier, Angeliño deberá agardar: o City gañou este martes 0-1 ao Sunderland, pero o galego non foi convocado. Os de Pellegrini loitan por ser campións, e son segundos con 47 puntos, a tres do sorpredente líder, o Leicester.
Angeliño voltou en decembro a Manchester despois de estar cedido seis meses no New York City, equipo vinculado ao ManCity, da Major League Soccer (MLS). Alí medrou como xogador e compartiu vestiario con veteranos como David Villa, Pirlo ou Lampard. Sobre a súa experiencia en Nova York, Angeliño apuntou a City TV: “Moi boa, gozei moito xogando alí, pero na miña mente sempre estivo voltar ao Manchester City”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.