Deixar de fumar mellora o ánimo

Un estudo da Unidade de Tabaquismo da Universidade de Santiago demostra que un tratamento psicolóxico cognitivo condutual favorece a diminución da sintomatoloxía depresiva.

Por Galicia Confidencial | Santiago | 04/02/2016 | Actualizada ás 23:35

Comparte esta noticia

Deixar o consumo de tabaco fai aos fumadores máis felices. Isto é o que se pode deducir das conclusións dun estudo realizado polo equipo da Unidade de Tabaquismo e Trastornos Aditivos da Facultade de Psicoloxía da Universidade de Santiago de Compostela (USC), que dirixe o profesor Elisardo Becoña, e que foi publicado este mes na prestixiosa revista Journal of Affective Disorders.

Fumar é a principal causa de mortalidade evitable.
Fumar é a principal causa de mortalidade evitable.

As persoas que deixan de fumar por medio dun tratamento psicolóxico cognitivo condutual presentan unha diminución da sintomatoloxía depresiva, que se mantén conforme pasa o tempo de abstinencia. Así o constata este estudo que vén de facer público a USC.

O equipo da universidade compostelá comprobou nunha mostra de 242 fumadores –cunha media de idade de 41,71 anos e de 20.57 cigarrillos por día– que os que deixan o tabaco conseguen, co tratamento psicolóxico que lles aplican, un descenso da súa sintomatoloxía depresiva, “o que demostra a eficacia do tratamento tanto para deixar de fumar como para mellorar o seu estado de ánimo”.  

Becoña sinala como o resultado máis importante e novidoso do estudo que aquelas persoas que seguen abstinentes co paso do tempo, ata un ano despois, logran que dita sintomatoloxía depresiva siga descendendo, informa a USC. “Á metade desde antes do tratamento a un ano despois”, matiza o profesor.

As estratexias de xestión de estado de ánimo que se utilizan poden, xa que logo, ser decisivas non só para aumentar a probabilidade de deixar de fumar, senón tamén para mellorar o estado de ánimo. "De aí a importancia de incluílas nos tratamentos independentemente de se a depresión está ou non presente”, advirte o catedrático da USC. “Podemos concluír que deixar de fumar é recomendable mesmo naquelas persoas que se pensaba que terían dificultades debido a que presentan problemas depresivos”, di. 

Cinco programas para deixar de fumar 
Unidade de Tabaquismo e Trastornos Aditivos da USCofrece varios tipos de tratamento para persoas que demandan axuda deste servizo da Facultade de Psicoloxía, realizados individualmente e en grupo.

Na actualidade, existe a posibilidade de participar nun programa xenérico aberto a calquera persoa; e outros tres específicos, para mulleres ás que lles preocupa aumentar peso ou experimentar problemas co estado de ánimo, para persoas con graves problemas de saúde causados polo consumo de tabaco e que precisan unha intervención intensiva e para quen decida seguir este programa dende a súa casa, por correo.  

As persoas interesadas nestes tratamentos da Unidade de Tabaquismo da USC poden contactar nos teléfonos 881 813939 ou 881 813861, así como por correo electrónico (elisardo.becona@usc.es; ana.lopez@usc.es).

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta