Por GC Tendencias | Madrid | 05/02/2016 | Actualizada ás 12:04
Manuel Rivas, o autor máis popular da literatura galega contemporánea, narrará na súa primeira serie para TV, "Oeste", unha gran historia sobre o narcotráfico ambientada en Galicia. O escritor desenvolverá este proxecto en colaboración con Daniel Écija, un dos creadores de ficción televisiva máis recoñecido de España, segundo informa a produtora Globomedia.
Globomedia é un dos grandes nomes do audiovisual español. Entre as súas series de éxito estiveron Águila roja, 7 vidas, Aída, El Barco, El internado, Los Serrano, Un paso adelante, Periodistas, Los hombres de Paco, Policías, en el corazón de la calle, Compañeros e Médico de familia. Tamén lanzou programas como El Intermedio, El objetivo, Zapeando, El Club de la Comedia, Los mayores gamberros, 59 segundos, Sé lo que hicisteis..., El informal, Caiga quien caiga, ¡Qué me dices! o El Gran Juego de la Oca.
A empresa informa que a serie, en fase de desenvolvemento, abordará o pasado e o presente do narcotráfico en Galicia, tomando como punto de partida a época dourada do narcotráfico nos anos oitenta e contando o rexurdimento nos últimos anos. A narración desenvolverase a través de personaxes que reflictan aos históricos do narcotráfico e tamén do presente. Globomedia promete que "Oeste" presentará un retrato naturalista do narcotráfico e dos seus protagonistas a ambos os dous lados da lei. "Un mosaico de personaxes verosímil ao redor dunha actividade delituosa que permaneceu durante moitos anos impune", asegura.
Manuel Rivas definirá un universo de personaxes que terá como referencia "Todo é silencio" -novela editada por Rivas en 2011 e que aborda a vida na costa galega e o salto do contrabando ao narcotráfico- e que, desde a proximidade coa realidade, permitirá coñecer ao gran público un dos fenómenos delituosos máis importantes e con máis repercusión da historia. Con varias das súas novelas adaptadas ao cinema ("O lapis do carpinteiro", "A lingua das bolboretas"), Rivas penetrarase nun mundo que coñece moi ben, como xornalista que seguiu a actividade do narcotráfico e como novelista que utilizou este argumento para un dos seus libros.
A serie rodarase nos mesmos espazos naturais nos que ocorreron os feitos fundamentais do narcotráfico en Galicia. As rías galegas terán un protagonismo fundamental nesta ficción como o teñen na realidade do narco.
Ademais de Globomedia, "Oeste" contará coa participación de Ficción Producións, empresa galega e con longa experiencia no desenvolvemento de proxectos ambientados e rodados en Galicia como "Códice" e "Hospital Real".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.