Por gcdeportes | Lugo | 07/02/2016 | Actualizada ás 00:48
Ficha técnica:
CB Breogán 90: Dani López (8), Jeff Xavier (5), Matulionis (18), Pep Ortega (17) e Samb (9) --cinco inicial-- Devin Wright (13), Rakocevic (9), Llorente (6), Fede Ucles (5) e Álex López (0).
COB 68: Pedro Rivero (18), Kapelan (7), Jonathan Barreiro (6), Max Salash (6) e Kyle Rowley (11) --cinco inicial-- Rejón (8), Jhornan Zamora (7), Tomás Fernández (5), Ánder Martínez (0) e Juan Ballesta (0).
Parciais: 21-24, 22-23 (43-47), 21-12 (64-59), 26-9 (90-68).
Árbitros: Ángel de Lucas e Arnau Padrós. Eliminaron por cinco faltas persoais a Rejón.
Incidencias: partido da 20ª xornada da LEB Ouro no Pazo Provincial dos Deportes de Lugo ante preto de 3.000 espectadores.
Foi mellor o COB nos dous primeiros cuartos, pero tralo descanso o Breogán apertou en defensa e cun parcial de 47-21 pasou por riba dos ourensáns, que desapareceron da pista. Por 90-68 gañaron os lucenses o derbi do Miño e, tras tres derrotas consecutivas, sumaron a novena vitoria, a tan só unha dos play-off de ascenso; Ourense queda con oito. Osvaldas Matulionis anotou cinco triplas para 18 puntos, e Pep Ortega, 17 puntos e 9 rebotes en tan só 22 minutos. Nos ourensáns, o de sempre, o capi Pedro Rivero, con 18 puntos, 4 rebotes e 5 asistencias.
COB mandou na pintura no arrinque do partido, e con sete puntos de Kyle Rowley máis unha tripla de Jonathan Barreiro púxose por diante (10-16). Só Pep Ortega, con 6 puntos, estaba atinado nos lucenses, que perdían a batalla do rebote. Unha tripla de Kapelan e un 2+1 de Barreiro e 14-22 no marcador. Un tiro libre e a primeira tripla de Matulionis deixaron a vantaxe ourensá en 21-24 tras dez minutos.
Devin Wright deulle a volta ao marcador cun parcial de 8-2 para os lucenses. Gonzalo García parou o partido con 29-26 a 6:47 do descanso e Pedro Rivero asumiu o mando, e con 12 puntos case consecutivos (tres triplas e un 3+1 incluído) puxo de novo por diante ao COB (39-42). Outra tripla, esta de Jhornan Zamora, e 43-47 no tempo de lecer.
Rivero anotou tras dous rebotes ofensivos do COB, pero a acción negativa fixo espertar ao Breo. Triplas de Pep Ortega e Matulionis e os lucenses estaban xa por diante (54-53). Os de Lisardo Gómez apertaban en defensa e o COB xa non vía aro coa facilidade do primeiro tempo. Samb, desaparecido ata entón, fixo sete puntos consecutivos e o Breo dominaba xa de cinco. Rejón parou o parcial lucense de 8-0 e o marcador quedou 64-59 para os últimos dez minutos.
O Breo, concentrado en defensa, arrincou a tope e cun parcial de 15-3 sentenciou o choque, con tres triplas case consecutivas de Matulionis. COB parou o partido con 67-59, pero non puido frear o ritmo anotador do rival, que abriu oco ata un 79-62. Ucles anotou unha tripla (84-65) e Gonzalo García deu por perdido o partido sentando a Rivero no banco a falla de tres minutos. Ao final, 90-68 trala bomba final de Jeff Xavier, que debutaba no Pazo lucense.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.