A futura lei de administración ambiental simplificada reducirá os trámites das instalacións gandeiras

A conselleira de Medio Ambiente e Cambio Climático, Ángeles Vázquez, anunciou que a Xunta reducirá a complexidade dos trámites das instalacións gandeiras mediante a futura lei de administración ambiental simplificada. Así o explicou este mércores durante unha reunión con representantes da Federación Galega de Porcino e da Asociación Galega de Avicultura de Posta para tratar o contido e principais obxectivos da norma. Desta forma, a conselleira remarcou a importancia que terá a futura lei para o sector gandeiro galego no impulso e desenvolvemento de novas iniciativas e proxectos.

A reunión, segundo detallou a Xunta nun comunicado, forma parte da rolda de contactos que comezou a finais de outubro co obxectivo de acordar o documento inicial cos principais sectores, colectivos profesionais e entidades que se poidan ver afectados directa ou indirectamente pola futura lei. Tras superar a fase de consulta pública, o próximo paso, explicou a conselleira, será tratar a redacción do borrador normativo para o que citarán a outras entidades para coñecer a súa opinión.

A conselleira de Medio Ambiente e Cambio Climático, Ángeles Vázquez, reúnese con representantes da Federación Galega de Porcino e da Asociación Galega de Avicultura de Posta | Fonte: XUNTA