Por GC Emprende | Compostela | 08/02/2016 | Actualizada ás 13:00
Aínda que 2016 foi sinalado como o ano no que a crise ía quedar atrás, moitos analistas esperan que será aínda un ano de transición. A economía española terá aínda que superar algúns obstáculos, pero poden ter xa capacidade de aforro. Recollemos dez formas de investimento que previsiblemente aumentarán o seu volume en 2016.
Depósitos bancarios. Son os favoritos das familias españolas, en 2013 o 46,8% dos aforros españois destinábase a este tipo de depósitos en comparación co 33,2% dos aforros europeos (ver info.). En 2015, os depósitos ofreceron rendibilidades de entre o 0,40% e 0,85% TAE. Os tipos de interese excesivamente baixos están a provocar a saída de activos cara a outros produtos con rendibilidades maiores.
Fondos de investimento. Son outra das formas de investimento que con máis frecuencia ofrecen aos aforradores os bancos españois. No 2015 a rendibilidade media anual dos fondos de investimento españois foi do 1%, segundo datos de INVERCO, pero o abano de fondos é moi amplo e as rendibilidades tamén.
Fondos de pensións. Outra das diferenzas entre España e Europa é que os europeos invisten máis que os españois en plans de pensións privados (16,5% en España fronte ao 38% en Europa, en 2013). Con todo, a maioría estima que aumentarán as súas achegas a este tipo de plans nos próximos anos. Segundo INVERCO en 2015 deron unha rendibilidade media anual do 0,5%.
Débeda pública. A crise obrigou aos estados a emitir letras, bonos e obrigacións de maneira continua e os investidores víronas como un valor seguro. Os bancos son os principais investidores en débeda pública e ofrécena aos seus clientes a través de distintos instrumentos, pero son moi poucos os galegos que adquiren bonos, letras e obrigacións de forma directa. O tipo de interese medio ofrecido polo Bono a 10 anos en 2015 foi do 1.7%. (Ver datos).
Compra de Inmobles. Tradicionalmente foi unha dos investimentos favoritos dos españois, pero os excesos cometidos durante a burbulla inmobiliaria teñen provocado unha gran desconfianza neste mercado. Segue sendo un sector pouco seguro para moitos, a pesar de que o prezo da vivenda empeza subir nas capitais de provincia tras 8 anos seguidos de baixadas. (Un 29% en 2015 en datos a Sociedade de Tasación).
Arte. É unha opción elixida por poucos xa que require coñecementos previos e ten pouca liquidez. O mercado da arte moveu en 2013 en España 336 millóns en vendas totais segundo un informe da Fundación Arte e Mecenado, o que supón un aumento do 3% anual. Os altos prezos alcanzados recentemente por algunhas obras moi coñecidas, fan presaxiar un ano de crecemento en 2016.
A bolsa. A volatilidade da bolsa foi moi alta nos últimos meses pero a maioría de analistas esperan crecementos de entre un 9 e 14% en 2016 no volume de activos coa economía española á cabeza do crecemento na zona euro. Para conseguir boas rendibilidades hai que elixir ben os valores. A rendibilidade media do IBEX 35 foi do -3.5% en 2015, incluíndo os dividendos repartidos.
O MAB. En 2015 o Mercado Alternativo Bolsista, pechouse con 34 empresas en expansión, máis de 3.700 SICAV, 11 SOCIMIS e 11 SIL. As empresas conseguiron unha recadación próxima aos 100 millóns de euros, un 9% menos que en 2014 (datos). Os xestores do MAB teñen boas expectativas para o 2016, con novas incorporacións anunciadas, pero aínda que pode ofrecer unha alta rendibilidade, é tamén un mercado moi volátil, aconsellado para investidores con experiencia.
Capital risco. Tamén para investidores experimentados, a CNMV ten actualmente máis dun centenar de Sociedades de Capital Risco rexistradas, que segundo a asociación ASCRI, moveron un volume de 2.790 M? en 2015, case un 20% menos que o ano anterior, iso si, cun 9% máis de operacións. Con menor supervisión e vantaxes fiscais, o Capital Risco converteuse na forma favorita de investimento de numerosos fondos internacionais dispostos a asumir riscos para conseguir rendibilidade.
Crowdlending. Esta forma de investimento crece anualmente a ritmos superiores ao 100% en España. A recente regulación legal achegou unha maior confianza a este sistema e calcúlase que en 2015 en España prestáronse máis de 30 M a través das distintas plataformas de crowdlending. Captan a empresas solicitantes de préstamos, valoran a súa capacidade económica e ofrécenllas aos investidores que se deron de alta na súa plataforma online para que eles decidan se prestarlles diñeiro e canto. Non é necesario ser un investidor avanzado, nin ter grandes cantidades de diñeiro, calquera persoa pode darse de alta e empezar a investir pequenas cantidades nos distintos proxectos. A plataforma ocúpase de formalizar os contratos e de que os investidores reciban mensualmente a súa amortización mensual e a rendibilidade convida, a miúdo de entre o 7 e o 12%. No caso de MytripleA a rendibilidade media para o investidor no ano 2015 foi do 7,43% e o investidor pode investir desde 50? nos proxectos que elixa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.