Por Galicia Confidencial | Compostela | 12/02/2016 | Actualizada ás 09:00
A polémica pola listaxe provisional de 256 rúas "franquistas" preparado pola Cátedra Complutense "Memoria Histórica do século XX" para o concello de Madrid tamén chegou a Galicia e salpica a un dos grandes escritores galegos, Álvaro Cunqueiro.
E é que o presidente da Xunta, Alberto Núñez Feijóo, aproveitou a presencia do nome do escritor nesa listaxe para escribirlle á alcaldesa de Madrid, Manuela Carmena, e dicirlle "formalmente" que é "totalmente absurdo" cuestionar a unha figura como Álvaro Cunqueiro, da que "todos os galegos están especialmente orgullosos". Tamén para pedirlle que inclúa o seu nome na rectificación das rúas susceptibles de eliminación.
Feijóo remitiu a misiva despois de que a propia alcaldesa de Madrid recoñecera que era un “disparate” incluír este e outros nomes como o de Salvador Dalí, Santiago Bernabéu ou Josep Pla. De feito, a Cátedra anunciou que renuncia a asesorar ao Concello de Madrid para elaborar o seu Plan Integral de Memoria pola “incapacidade da institución para garantir as condicións mínimas para desenvolver un traballo profesional e sosegado, como require toda investigación científica" e explicou nun comunicado que lles atribúen "múltiples propostas que son falsas".
"Hoxe vin, espero que estea ben, escoiteino, que a Cátedra da universidade se enfadou definitivamente coa alcaldesa e di que non vai seguir traballando na eliminación de rúas porque non ten a tranquilidade intelectual para seguir; pois ben, se queren tranquilidade intelectual con Galicia que a respecten e respectar a Galicia é respectar a Álvaro Cunqueiro", dixo a este respecto Feijóo.
Ademais, aproveitou para tentar pescar en río revolto e atacou a "Podemos Mareas" porque dixo, "este asunto merece unha explicación desde este partido político".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.