O responsábel de Telecomunicacións de Chile aplaude a audacia empresarial dos galegos
O subsecretario de Telecomunicacións de Chile, Pedro Huichalaf, visitou esta mañá en Santiago de Compostela a sede central da empresa Plexus e puido coñecer os últimos desenvolvementos tecnolóxicos da empresa galega en materia de transportes e turismo, mostrándose interesado -segundo informa a compañía- tamén noutros produtos ligados á sanidade ou a educación
Por Galicia Confidencial | Santiago de Compostela | 12/02/2016 | Actualizada ás 18:19
O subsecretario Huichalaf dixo "estar gratamente impresionado pola capacidade de que unha empresa TIC como Plexus poida desenvolver produtos competitivos a escala internacional e interesar a empresas do seu país". "Valoro -engadiu- a audacia dos galegos, a súa capacidade para chegar e triunfar en calquera lugar do mundo, e agora resalto a vocación universal das súas empresas, como Plexus, cuxos produtos e a fórmula para implicarse nos sectores produtivos locais, xerando riqueza e emprego, son un modelo para seguir".
No transcurso da visita, Antonio Agrasar, conselleiro delegado desta empresa, confirmou o compromisocoa internacionalización. "Facémolo -asegurou- convencidos que desde Galicia é posible competir, facelo en vanguardia, determinando a oportunidade, creando novos produtos, colaborando coa Universidade e cos emprendedores, considerando a vocación dos nosos mozos, e aproveitando a profundidade da nosa emigración, presente en todo o mundo e en postos de relevo".
Esta compañía está xa en Chile, Reino Unido, Escocia, Francia, Portugal, México, República Dominicana, Bolivia, Marrocos. Nalgúns lugares como Santiago de Chile e Londres xa contamos con delegacións.
