AGE propón pagarlle 69 millóns ás construtoras do hospital de Vigo para “rescatalo”
Denuncia que a privatización desta obra está chea de “irregularidades” e que o seu rescate evitará que os galegos acaben pagando os 1.414 millóns que a Xunta de Feijóo comprometeu nos vindeiros 20 anos
Por Galicia Confidencial | Compostela | 17/02/2016 | Actualizada ás 16:00
O portavoz de AGE, Xosé Manuel Beiras, saíu este mércores ao rescate do hospital de Vigo. Fíxoo cunha iniciativa parlamentaria na que pide anular a concesión do novo hospital Álvaro Cunqueiro de Vigo por 69 millóns de euros, xa que considerou que hai indicios de nulidade no contrato a unha empresa privada.
Por iso, propón comprar o capital social da firma concesionaria valorado en 31,5 millóns de euros e a pagar os créditos contraídos por valor de 38 millóns de euros, o que suma 69,5 millóns. Di que, deste xeito, os contribuíntes galegos deixarían de pagar os 1.414 millóns de euros comprometidos pola Xunta de Feijóo por un período de vinte anos á firma concesionaria.
Así explicou que este “rescate” público do hospital débese ás numerosas “irregularidades" que se teñen detectado por parte da concesionaria privada do edificio. Neste sentido, lembrou que o Consello de Contas advertiu nun ditame en 2012 de que a concesión actual, que é de vinte anos, "compromete a sustentabilidade financeira" do sistema de saúde público galego.
A auditora Ernst&Young destaca nun informe sobre o exercicio de 2014 que o valor do hospital é de 232 millóns de euros. Por iso, AGE apunta que as condicións do contrato de concesión mostran unha "evidente causa de nulidade".
A coalición parlamentaria AGE indica na súa proposta que o proxecto inicial da Xunta era construír un hospital público, pero que o Goberno de Feijóo decidiu, posteriormente, acordar tal construción cunha firma en réxime de concesión que "vulnera as normas de contratación pública" en España e as directivas da Unión Europea.
Así, lembrou que o Banco Europeo de Investimentos concedeu un préstamo para a construción do hospital á Xunta e, ao ser atribuído a un proxecto mixto público-privado, podería constituír "unha axuda de Estado ilegal". “Feijóo suplantou fraudulentamente o preceptivo estudo de viabilidade por un simple estudo económico financeiro e acabou facendo un cóctel de concesión de obra cun subrepticio contrato de servizos", denunciou en rolda de prensa.
