Por Galicia Confidencial | Vigo | 10/03/2016 | Actualizada ás 10:00
Traballadores do Complexo Hospitalario Universitario de Vigo (Chuvi) protestaron este mércores nos hospitais Álvaro Cunqueiro e Meixoeiro polos intentos por parte da Xerencia de censurar as críticas pola falta de persoal ou polos problemas na xestión destes centros hospitalarios
O motivo desta mobilización ten que ver cunha circular do responsable da EOXI, Félix Rubial, no que insta os xefes/as de servizo a retirar as mensaxes que os traballadores puxeron no centro e nas que denuncian as carencias existentes nos centros médicos da rede sanitaria pública viguesa. Ao mesmo tempo, o comunicado advirte da posibilidade de que se impoñan sancións no caso de que os carteis e os avisos volvan aparecer nos corredores dos centros médicos.
“Dende hai certo tempo -sinala a circular- están sendo expostos nas dependencias do hospital, en lugares non autorizados e utilizando diversos soportes, mensaxes alertando sobre o deficiente funcionamento das unidades e as súas posibles consecuencias para a saúde dos doentes debido á presunta insuficiencia do cadro de persoal na unidade, entre outros”. Esta, acusa o xerente, é unha información que “claramente induce temor, alarma e desconfianza entre pacientes e familiares sobre a asistencia sanitaria”.
Segundo o responsábel sanitario, a exposición de mensaxes críticas coma estas “pode vulnerar o dereito da debida protección da saúde” e por iso “procederase á retirada inmediata”. Ademais, sinala que “os empregados públicos que exhiban esta información ou a difundan polo centro hospitalario expóñense de agora en diante a posíbeis sancións administrativas”. Estas sancións poden afectarlle aos responsábeis das unidades nas que se manteñan expostas as mensaxes “por ir contra o Estatuto Marco para o persoal estatutario dos servizos de saúde”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.