Por Galicia Confidencial | Pontevedra | 13/03/2016 | Actualizada ás 15:15
“Cuestión secundaria” de índole formal. Así valorou Íñigo Errejón a proposta de que En Marea se transforme nun partido.
Apelando a autonomía do "espacio político propio" de Galicia, o aparato estatal de Podemos dá deste xeito luz verde ao plan trazado pola confluencia galega e que Xosé Manuel Beiras quere implementar ante a eventual repetición das xerais. O líder de ANOVA cre que coa transforamción da coalición do seu partido, ANOVA, Podemos e as mareas locais nun partido -aínda que non se disolvan as outras organización- estaría solventando o escollo que impediu a En Marea ter grupo propio, como comprometera na campaña do 20D.
Para o número 2 de Podemos en España o fundamental é que “En Marea siga sendo quen de atraer a esa maioría social que pide un cambio nas institucións” e “o xeito de concurrir ou a fórmula xurídica” resulta unha “cuestión secundaria”. Son palabras de Errejón tras visitar aos mariñeiros do cerco.
Queda claro que para Podemos, polo menos a nivel estatal, a clave é botar ao PP do poder. Agora ben, está por ver quen gaña nas primarias de Podemos Galicia. O líder dos críticos, o actual secretario xeral, Breogán Riobóo, mostrouse crítico co protagonismo dos nacionalistas de ANOVA na pasada campaña.
O compromiso de transformar En Marea nalgo máis formal xa figuraba no acordo para as pasadas eleccións xerais. De feito, é unha reinvidicación pública dende hai meses do Encontro por unha Marea Galega -a plataforma que participou na coalición- e de partidos pequenos como Espazo ou Equo. Con todo, é o fracaso da consecución do grupo parlamentar quen meteu presa a a algúns dos actores da confluencia.
A eventual transformación da confluencia en partido non será en ningún caso doada. Por exemplo, ten que solucionar primeiro cuestións ideolóxicas básicas (por exemplo ANOVA considera o dereito de autodeterminación unha prioridade, mentres que Podemos non) e tamén económicas (hoxe os cartos logrados polo éxito electoral repártense en tres partes iguais entre EU, ANOVA e Podemos e se hai un partido
cómpre pactar un novo reparto).
Chegar a un acordo sobre estas cuestións require tempo. Tempo que pode escasear se, finalmente, o PPdeG adianta as eleccións autonómicas para que coincidan coas posíbeis eleccións xerais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.