Os concellos da área de Santiago estrean novo modelo para o trato dos animais
O refuxio de Bando, en Santiago, contará con máis orzamento e nova dirección para tentar evitar a situación de colapso actual.
Por Galicia Confidencial | Compostela | 23/03/2016 | Actualizada ás 11:51
O padroado da Fundación Refuxio de Animais acordou un novo modelo de funcionamento para as instalacións Bando, en Santiago, e abriu un período máximo de tres meses para achegar propostas.
Deste xeito, o refuxio contará con máis fondos e con nova dirección que, a diferencia do que acontecía agora, dividirase en dous cargos que se encargarán da xestión económica e das xestión laboral. O obxectivo é evitar a situación de desorganización que, segundo o Concello de Santiago, existía ata agora.
Por iso, a actual directora do centro será relevada e a fundación abre un novo período de tres meses para atopar os seus substitutos.
Na reunión celebrada este martes, os integrantes do organismo coincidiron en que o funcionamento é mellorable e en que o actual modelo de xestión está caduco, á parte de pór de manifesto a necesidade de conseguir fondos, máis aló das achegas dos municipios.
A concelleira de Benestar Animal en Compostela, Noa Morais, explicou que este ano o Concello achega un total de 170.000 euros, 35.000 máis que o pasado; Teo, 30.000, e Vedra 8.000 euros, mentres que a Deputación da Coruña colabora con 28.000. En todo caso, a edil expresou que entende que son necesarias máis axudas e tamén do sector privado.
