Por Galicia Confidencial | Santiago | 31/03/2016 | Actualizada ás 11:00
A Xunta dixo que porá en marcha unha nova materia de libre configuración para a promoción da igualdade de xénero. Segundo declarou onte no Parlamento Alfonso Rueda, o Goberno galego tamén está a estudar a implantación dun ciclo formativo de FP superior que afonde neste obxectivo.
Durante a súa intervención, o vicepresidente da Xunta subliñou que "o respecto á diversidade sexual e de identidades de xénero dende a escola resulta fundamental".
A Xunta presume que dende o curso 2014-2015 en Galicia están adaptados os currículos do ámbito nacional e autonómico para que o alumnado galego reciba unha adecuada formación en valores. Trátase dos currículos de primaria, FB básica, ESO e bacharelato. Neles explicítase a necesidade de evitar os comportamentos sexistas e os estereotipos que supoñan discriminación por razón da identidade sexual ou de xénero, así como de favorecer a visibilidade da realidade LGTBI.
O político anunciou a convocatoria antes de rematar este ano dunha orde de axudas e subvencións para asociacións do colectivo LGTBI.
Interpelación do PSdeG
Trátase de medidas insuficentes para o principal partido da oposición. A portavoz de Políticas Sociais e LGTBI do Grupo Socialista, Carmen Gallego, acusou á Xunta de “meter a Lei de Visibilidade e non Discriminación das persoas LGTBI no armario”. Así o dixo no debate dunha Interpelación na que acusou ao Executivo autonómico de ter feito “nada, en ningures, de ningún xeito” para desenvolver a norma.
A deputada socialista preguntoulle ao PP “para que apoiaron a Lei cando manifestan que queren incumprila” logo de 2 anos da súa aprobación nos que demostraron, dixo, que “o Goberno non a interiorizou, non a consideraron nin importante nin prioritaria”. Acusounos de tela apoiado “porque esteticamente quedaba ben, pero aí quedou todo”, nun “xesto inicial que creou expectativas e esperanzas que hoxe volveron a frustrarse”.
Lamentou que a Xunta teña renunciado a cumprir a norma, xa que “non só non asumiu o que di o texto legal, senón que a súa práctica cotiá o contradí”. Sinalou ás campañas publicitarias cun só modelo de familia, falla de referentes da diversidade nos medios de comunicación, a armarización das persoas maiores ou das persoas con discapacidade cando entran no circuíto da atención dos servizos sociais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.