Abanca presenta un novo sistema de pago dixital

Abanca vén de lanzar para todos os seus clientes ABANCA Pay, unha aplicación que permite realizar desde os móbil pagos inmediatos de forma gratuíta a calquera usuario bancario nacional e europeo, teña teléfono ou non.

“É unha ferramenta útil, fácil de usar, sen comisións e que realiza as operacións de forma inmediata co obxectivo de facerlle máis sinxela a vida aos nosos clientes, facilitándolles as súas transaccións diarias”, explica Eduardo Aldao, director de Innovación da entidade bancaria.

ABANCA Pay permite o pago de ata 150 euros por operación, de forma gratuíta, a calquera persoa, sexa do banco que se sexa, simplemente introducindo un número de teléfono ou un correo electrónico. “Non é necesario pedir o número de conta a ninguén, nin é necesario que pertenza á mesma entidade. Con esta aplicación o cliente poderá enviar e recibir diñeiro dos seus amigos ou compañeiros de traballo de forma instantánea”, apunta o xerente de Medios de Pago de Abanca, Jorge Blanco.

A aplicación deseñada está asociada á conta de banca electrónica do cliente e permite realizar un pago a unha persoa simplemente seleccionándoa na axenda de contactos do móbil, sen que sexa necesario que coñeza o seu número de conta nin que pertenzan á mesma entidade financeira.

ABANCA Pay está conectada a outros bancos a través da rede EALIA desenvolvida por CECA, o que permite realizar os pagos de forma inmediata. “O pago é inmediato, faise efectivo directamente entre as contas dos clientes no mesmo momento da súa autorización”, afirma Eduardo Aldao. Ademais, ao contrario que outras aplicacións similares, non é necesario ter descargada a app para recibir diñeiro doutra persoa.

Esta entidade bancaria xa foi pioneira en ofrecer aos seus clientes o pago móbil con Samsung Pay e en soportar a identificación por pegada (Touch-id) na banca móbil.