Feijóo repetirá como candidato á Xunta
O presidente do PPdeG confirma aos seus compañeiros que a súa "difícil decisión" é volver a loitar pola presidencia do Goberno Galego. Non parece que vaia haber adianto electoral.
Por Galicia Confidencial | Santiago | 02/04/2016 | Actualizada ás 12:10
Sen sorpresas na agardadísima reunión da dirección conservadora galega. Alberto Nuñez Feijóo acaba de confirmar que tomou a "difícil decisión" de repetir como candidato á Xunta.
"Sempre que tiven que decidir, elixín Galicia", declarou visiblemente emocionado diante dos seus compañeiros. A práctica totalidade dos presentes xa daba por feito que Feijóo os convocara -incluídos aos ex-conselleiros- para facer un alarde de forza de cara ao lanzamento da súa candidatura. "Non hai maior honra na miña vida que servir a Galicia", declarou no Comité reunido esta mañá no Hotel Palacio del Carmen de Santiago de Compostela.
Tampouco parece que haxa novidades na data dos comicios. "Galicia terá até a fin un goberno estábel", asegurou, descartando en principio un adianto electoral. O mandatrio recoñeceu que "non son intres doados" para o seu partido pero comprometeuse de novo coa "estabilidade". En clave xa electoral indicou que "Galicia segue precisando un partido sólido,con equipo e que sitúa galegos no centro das políticas". Aposta polo centro que tamén se ve no slogan escollido polo PP: "as persoas no centro".
A posta en escena deste sábado, con todos os mandatarios convocados (incluídos os ex-conselleiros, algo non habitual) demostra que Feijóo necesita sacar peito tanto en Galicia como en Madrid.
O político galego sabe que a súa posición como hipotético sucesor de Mariano Rajoy está tocada -por motivos que tampouco teñen moi claros máis alá da foto con Dorado-, como quedou demostrado cando case ninguén do PP estatal o apoiou a pasada semana, tras declarar que igual o seu futuro estaba na empresa privada.
De acordo a esta liña de argumentación, Feijóo presentarase as eleccións galegas como chanzo final para o seu verdadeiro obxectivo, dirixir o PP no Estado. Feijóo conta cunha vitoria en Galicia, pois os conservadores din manexar enquisas que lle dan entre 36 e 38 deputados.
Revalidar a Xunta -en solitario con 38 ou co apoio de Ciudadanos con menos- nun intre de claro retroceso electoral do PP en toda España situaríao na primeira posición para ocupar a cadeira dun Rajoy, cuxa condución da dereita en España durará o mesmo que se tarde en formar goberno no Estado.
