Por Galicia Confidencial | Lugo | 11/04/2016 | Actualizada ás 17:00
A agricultura e a gandaría ecolóxica xa son unha realidade en Galicia. Un sector que, ademais, vai en aumento. O pasado ano o volume de facturación creceu en algo máis dun 7% e facturou 33.334.000 euros.
Segundo informou o presidente do Consello Regulador -Craega-, José Antonio Fernández, estas cifras constatan o crecemento da agricultura e da gandaría en Galicia que, lembrou, non deixou de mellorar desde o ano 1997.
Ademais de incrementar a facturación, tamén aumentou nun 13,5% o número de operadores inscritos no rexistro do consello regulador -que contempla a industrias transformadoras, comercializadores e produtores gandeiros e agrícolas-, até chegar aos oitocentos.
Tamén se incrementou en máis dun 33% durante o pasado ano o número de hectáreas certificadas para a produción ecolóxica, de modo que nestes momentos a superficie acreditada polo Craega xa supera as 20.000 hectáreas.
Lugo segue sendo a provincia con máis hectáreas certificadas para a produción ecolóxica, mentres que a produción de leite e derivados é a actividade con maior peso dentro das acreditadas polo Craega.
Fernández participou este luns en Monforte, xunto co alcalde da vila, José Tomé, a conselleira do Medio Rural, Ángeles Vázquez, a directora xeral de Gandaría, Agricultura e Industrias Agroalimentarias, Belén do Campo; e a delegada territorial da Xunta de Galicia en Lugo, Raquel Arias, na presentación do balance do consello regulador.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.