Por Galicia Confidencial | Santiago | 21/04/2016 | Actualizada ás 14:15
As tres universidades galegas sitúanse entre as máis comprometidas co uso de software libre entre todas as do Estado. En concreto, A Coruña, Santiago e Vigo colócanse no quinto, sexto e sétimo posto, respectivamente, entre as 76 universidades españolas avaliadas polo seu compromiso na difusión do software libre (SL). Así se desprende do Ránking de Universidades en Software Libre (RuSL) na súa edición de 2016.
A comparativa realízase en base ao indicador IDSL Índice de Difusión del Software Libre), que facilita la comparación entre universidades.
O RuSL é un ranking especializado que clasifica as universidades en función de 65 indicadores que miden o traballo que realiza cada unha delas no ámbito do coñecemento libre dende todos os seus estamentos. O traballo lévao a cabo unha comisión de expertos do sector coa colaboración das propias universidades.
En total avaliáronse once dimensións: Produción, Colaboración externa, Investigación, Axuda, Docencia, Cultura en software libre, Tecnolóxicos, Divulgación, Webmetría, Institución e Administración. Cada una delas ten á súa vez unha serie de indicadores de valor específico.
A metodoloxía de RuSL segue os principios expostos polo IREG (International Ranking Experts Group), un grupo de expertos designados pola UNESCO que desenvolveu os principios de Berlín para valorar institucións de educación superior e que serven para unificar as metodoloxías que se seguen na elaboración das clasificacións e así poder comparalos.
Posición | IDSL | Universidade |
---|---|---|
1º |
100,00% |
Universidad Miguel Hernández de Elche |
2º |
93,40% |
Universidad de Granada |
3º |
81,19% |
Universidad de La Laguna |
4º |
61,69% |
Universidad de Sevilla |
5º |
60,83% |
Universidade da Coruña |
6º |
53,95% |
Universidade de Santiago de Compostela |
7º |
51,12% |
Universidade de Vigo |
8º |
48,19% |
Universidad de Las Palmas de Gran Canaria |
9º |
44,19% |
Universidad de Zaragoza |
10º |
33,08% |
Universidad Politécnica de Madrid |
11º |
30,72% |
Universitat Oberta de Catalunya |
A Universidade da Coruña destaca no apartado de Axuda, no que ocupa o primeiro posto dende o ano 2014. Na clasificación global, esta institución subiu un posto respecto ao ano 2015, pasando do sexto ao quinto.
A de Santiago tamén sobresae no apartado de Axuda, ocupando o segundo posto, logo de que no ano 2013 fose a primeira. No ranking global, a compostelá subiu dous postos respecto ao ano pasado e volve acadar o seu mellor índice histórico, co mesmo sexto posto que conseguiu en 2013.
Tamén destaca no apartado de Axuda a Universidade de Vigo, no cuarto lugar. A institución viguesa acada ademais a súa mellor clasificación xeral na súa historia, co sétimo posto, subindo dende o décimo lugar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.