Por Galicia Confidencial | Sada | 24/04/2016 | Actualizada ás 22:18
As mareas municipalistas seguen avanzando para seren as protagonistas dunha probábel confluencia de parte da esquerda galega nas eleccións autonómicas. Este colectivo, denominado Mareas en Común, organizou o sábado en Sada o que xa é a súa cuarta reunión de ámbito galego.
A conclusión é que lanzarán formalmente o seu proceso de “construción dunha confluencia das forzas do cambio que poida gañar as vindeiras eleccións autonómicas” a partir do 7 de maio. Bautizaron a esta iniciativa como “Marea Viva”.
A “Marea Viva” bota a andar con oito principios ideolóxicos comúns básicos: garantía efectiva dos dereitos humanos, radicalidade democrática, transparencia e loita contra a corrupción, feminización da política e loita contra calquera tipo de discriminación, defensa dun modelo económico xusto que garanta os dereitos sociais, defensa da lingua e a cultura galega e o noso patrimonio, protección do medio e benestar animal, defensa do común e máis autogoberno e mellor vertebración territorial .
Que mareas participan nesta iniciativa e que partidos políticos mostráronse abertos a colaborar nesta confluencia? O grupo nunca publicou unha lista de mareas participantes nas reunións. Da de Sada informou que houbo unha participación dunhas “200 persoas e 30 mareas”, cifras similares as publicadas nas pasadas xuntanzas.
Entre os asistentes, dous alcaldes. O anfitrión de Sada, José Benito e o anfitrión da anterior xuntaza, na Pobra do Caramiñal, Xosé Lois Piñeiro. Tamén acudiu para “amosar o seu apoio” Xulio Ferreiro, da veciña Marea Atlántica d’A Coruña, unha das máis implicadas.
O proceso de adhesión a esta iniciativa está máis avanzado nalgúns concellos ca noutros. Entre os máis avanzados, por exemplo, o de Santiago, Compostela Aberta xa votou en Asemblea apoialo, coa especificade de reclamar tamén a constitución dun partido instrumental, algo que suscita dudas en Podemos. En Pontevedra, a marea local tamén acordou sumarse á carta de oitos principios desta iniciativa.
Entre as mareas que participaron nalgunha das xuntanzas destes meses están -entre outras- as de Ourense, Mos, Sober, Cambados, Mugardos, Cabanas, Marín, Lugo, Chantada, Noia, Vilalba, Betanzos, Ames, A Estrada e Cangas do Morrazo.
A nivel de política institucional, cómpre sinalar que a Sada tamén acudiron varios deputados de En Marea. Entre eles Yolanda Díaz (líder de Esquerda Unida) e os militantes de Podemos, Antón Gómez Reino e Ángela Rodríguez.
O papel de Podemos é precisamente un dos puntos máis delicados dunha repetición dunha confluencia, pois Gómez Reino e Rodríguez eran parte de “Agora Podemos”. Esta candidatura acaba de perder as eleccións internas do partido morado no país e a nova dirección é máis escéptica sobre revalidar o pacto de En Marea nos mesmos termos que para as xerais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.