Por Manuel Vilas | Santiago de Compostela / Ourense | 25/04/2016 | Actualizada ás 08:00
Na demanda presentada por Edgewater contra a Xunta inclúese un documento titulado “Pan estratéxico para o impulso económico e social da comarca de Bergantiños” que promete beneficios tanto para os municipios como para o citado IDEGA.
No referido aos concellos, a empresa canadiense promete aportar a Cabanas de Bergantiños e Coristanco un “importe conxunto superior aos cinco millóns de euros”. Este pode ser un dos factores que explica porque os alcaldes de Cabanas e Coristanco, ambos do PP, apoiasen sen fisuras a mina até o final.
Cómpre lembrar que a nivel popular a había división entre partidarios e detractore en Corcoesto. Nesta parroquia, a máis directamente afectada, a chegada dos canadenses tivo beneficios inmediatos coa contratación de varios veciños para os sondeos e o financiamento de romerías locais.
Agora ben, a importante asistencia ás manifestacións contra a mina indica que no conxunto da comarca, máis aló de Corcoesto, tamén había unha importante oposición a un proxecto; pois é evidente que unha macromina a ceo aberto podería ameazar a viabilidade de sectores relevantes na zona, como a gandería, o turismo rural ou a agricultura.
Eses cinco millóns comprometidos en particular a Cabanas e Coristanco eran a maiores dos previstos para alimentar o citado Plan Estratéxico. A filial española Mineira de Corcoesto SL comprometeuse a “aportación anual á execución e desenvolvemento do citado plan, durante os anos que dure o proxecto de Corcoesto, de entre 250.000 e 500.000 euros”.
Os canadenses prevían botar 13 anos explotando e rexenerando a zona. Polo tanto, o importe do Plan oscilaría entre os 2,5 millóns e os 6,5 millóns. Agora ben, a empresa tamén deixaba a porta aberta a investir menos no caso de lograr para o Plan “subvencións obtidas ou o acceso a fondos europeos”.
Edgewater deixou claro que ía encargar a redacción do Plan Estratéxico ao IDEGA da USC. Na documentación entregada no xulgado, a mineira asegura que xa pediu orzamento para elaboralo e que “tense avanzado un acordo” coa universidade . O prezo dos costes de elaboración solicitados pola USC, segundo este documento, serían de 500.000 euros.
O IDEGA foi un dos apoios clave de Edgewater para superar os primeiros trámites cara a aprobación inicial da mina. Este instituto universitario coelaborou o “Estudio sobre o impacto socio-económico da mina de Corcoesto”, un detallado documento de máis de 150 páxinas no que se defenden as bondades da explotación. Entre outras cousas, este estudio prevía “hasta un máximo de 1.628 puestos de trabajo, 480 directos, 474 indirectos y 664 inducidos por las rentas y el consumo correspondientes a los empleos generados directa e indirectamente”.
Foi este argumento, o dos postos de Traballo, o enarborado pola Xunta mentres apoiou a mina.
O goberno finalmente desbotouna, o que levou a Edgewaer a presentar unha demanda fronte ao Tribunal Superior de Xustiza de Galicia, demanda -a que tivo acceso GC- na que incluíu os documentos citados nesta información.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.