Equo e Espazo buscan fusionarse nunha Cooperativa Política
As dúas forzas consideran que a coalición AGE, da que son socios, está superada. De cara a futuras eleccións, apostan porque as mareas municipalistas sexan o único instrumento para construír unha nova confluencia.
Por Galicia Confidencial | A Coruña | 27/04/2016 | Actualizada ás 12:59
A Mesa Nacional de EQUO Galicia e o Consello Dinamizador de ESPAZO anuncian que iniciaron conversas para “avanzar na construción dun referente galego do ecoloxismo político, ecofeminista e ecopacifista”. Noutras palabras, estas pequenas dúas formacións avanzan cara unha posíbel fusión.
Os dous grupos enmarcan o diálogo como “parte do reagrupamento da esquerda galega renovadora do século XXI desde o soberanismo cívico, a sustentabilidade ambiental, a xustiza social global, a cultura da paz, os dereitos civís e a radicalidade democrática”.
O obxectivo final é organizar unha “asemblea de confluencia” o próximo sábado 21 de maio para xuntar a “esquerda verde galega" nunha "Cooperativa Política Galega”.
EQUO Galicia e ESPAZO foron dous dos partidos que conformaron Alternativa Galega de Esquerdas (AGE) para as eleccións autonómicas do 2012, primeira ‘experiencia’ de confluencia na esqeurda galega. Con todo, estes dous grupos non tiveron deputados, debido ao seu menor tamaño respecto aos socios de máis peso, ANOVA e EU. Equo Galicia si ten concelleiros, por exemplo no goberno da cidade da Coruña.
AGE está “superada polos seus limites no formato” ante a irrupción das mareas, consideran estas dúas formacións. As dúas levan meses traballando no foro de candidaturas municipalistas, bautizadas como Mareas en Común.
De cara a confluencias máis amplas, Equo e Espazo amosan o seu apoio á iniciativa Marea Viva, proposta polas mareas municipalistas, como “único espazo de construción de unidade popular sustentada no principio de democracia radical de unha persoa, un voto en pé de igualdade, sen controles de cúpulas ou intereses de parte e ao que se pode incorporar colectivos políticos e sociais”. É dicir, non están pola labor de repetir AGE nos mesmos termos que hai catro anos, senón por construír dende abaixo unha nova ferramenta.
