Por Galicia Confidencial | Carballo | 09/05/2016 | Actualizada ás 10:30
A III edición do Festival de Contidos Dixitais Carballo Interplay (CIP) quixo recoñecer, a título póstumo, o traballo do humorista Pedro Reyes, que, ademais protagonizaba unha das webseries que competiron na Sección Oficial, 'Pedro Reyes for president'-
"Este é un premio que nunca se deu no Festival, pero que tanto o xurado como a organización decidiu unanimemente dar nesta ocasión a unha persoa que xa non está connosco pero que admiramos profundamente", explicou a directora do festival Sonia Méndez en referencia a Reyes.
Pero, ademais do premio simbólico ao humorista, a cinta triunfadora da noite foi "El Partido", de Álex Rodrigo, que se alzou cos premios á Mellor webserie en imaxe real e á Mellor dirección coa súa historia de corruptelas políticas. Pola súa banda, 'Poetarras' volveron a conseguir o premio á Mellor webserie en versión orixinal en galego, categoría que xa gañara na primeira edición do CIP.
Pola súa banda, 'Arthur' foi recoñecida como a Mellor webserie internacional, coa súa historia dun asasino en serie que quere deixar o oficio. Nesta categoría recibiu unha mención especial 'Aventuras de corazón roto'. Así mesmo, 'Orfanato Atroz' fíxose co premio á Mellor webserie de animación grazas á súa narración dun universo aleatorio, categoría no que 'Niño ratón' obtivo unha mención especial.
Ademais, David Sainz foi o gañador do Premio AGAG ao mellor guión por 'El colega canario', unha historia sobre un mozo virxe que lle valeu o premio de Mellor Actor a Óscar Lara. Pola súa banda, Esperanza Gardado foi recoñecida como Mellor Actriz polo seu papel en 'Briget Jon de Triana'.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.