Galicia, entre as rexións con máis paro de Europa
Un informe de Eurostat sitúa a comunidade galega no grupo de 29 marcadas en vermello no mapa do desemprego na Unión Europea. Galicia conseguiu reducir o paro entre os mozos, pero é a única autonomía en España, xunto con Madrid, na que aumentaron os parados de longa duración.
Por Alberto Quian | Madrid | 28/04/2016 | Actualizada ás 13:34
Eurostat, a oficina de estatística da Comisión Europea, acaba de publicar un informe no que sitúa a Galicia no grupo de 29 rexións coas taxas de paro máis altas da Unión Europea. A comunidade galega é marcada en vermello no mapa do desemprego europeo e é, xunto con Asturias, a única rexión do norte de España incluída no grupo de cola en emprego, composto exclusivamente por rexións do sur de Europa.
O informe de Eurostat, con datos de 274 rexións do ano 2015, divide as rexións europeas en cinco grupos: as que teñen unha taxa de paro por debaixo do 4,7%, as que están entre o 7,2% e o 11,8%, as situadas entre o 11,9% e o 18,7% e, por último, as que superan o 18,8%, marcadas en vermello. É neste grupo no que se sitúa Galicia, cunha taxa de paro do 19,3%, o que a coloca como a única rexión do norte de España, xunto con Asturias (19,1%), no grupo europeo coas porcentaxes máis altas na UE. No Estado, Galicia ocupa o noveno posto cos índices de paro máis altos.
Malia que a comunidade galega conseguiu rebaixar a taxa de paro en 2,4 puntos entre os anos 2014 e 2015, non logrou saír dese grupo de cola. De feito, a baixada do paro en Galicia non é excepcional, xa que a maioría das rexións europeas reduciron a súa taxa de desemprego en 2015.
Galicia tamén conseguiu rebaixar o paro entre os máis novos, no grupo de 15 a 24 anos de idade, pasando do 48.5% en 2014 ao 43.5% en 2015, ocupando tamén o noveno posto no Estado coas taxas máis altas.
O dato máis negativo é o que se refire aos parados de longa duración, que só aumentaron en Galicia e na Comunidad de Madrid, en España. Así, no noso país pasaron do 53.4% en 2014 ao 54.7% en 2015, colocando a Galicia na oitava posición no Estado; mentres qu en de Madrid pasou do 53.4% ao 55.7%.
Segundo o informe de Eurostat, máis do 60% das rexións da UE rexistraron unha diminución de cando menos 0,5 puntos porcentuais na súa taxa de desemprego en 2015, en comparación con 2014. Porén, o informe salienta as enormes diferenzas existentes entre as distintas zonas, coas taxas máis baixas nas rexións alemás de Friburgo e Niederbayern (2,5%), Oberbayern e Oberpfalz (2,7%), e a checa de Praga (2,8%). No extremo oposto, as taxas de paro máis altas se rexistraron en Melilla (34,0%) e Andalucía (31,5%), Macedonia Occidental (30,7%), Canarias e Estremadura (29,1%).
Entre as 274 rexións daa UE para as que se dispón de datos, 60 tiñan una taxa de desemprego do 4,7% ou menos no ano 2015, isto é, a metade da media europea, que se situou no 9,4%. Destas, 24 rexións son de Alemaña, 21 do Reino Unido, cinco de Austria, tres da República Checa, dúas de Bélxica, Hungría e Rumania e unha de Italia.
Pola contra, 29 rexións tiveron unha taxa de do 18,8% ou máis: 11 de Grecia, 10 en España e catro en Francia (todos os departamentos de ultramar) e Italia. É neste grupo no que se sitúa Galicia.
