Por Galicia Confidencial | Compostela | 28/04/2016 | Actualizada ás 17:00
O Eurostat, a oficina de estatística da Comisión Europea, sitúa a Galicia no grupo de 29 rexións coas taxas de paro máis altas da Unión Europea dun conxunto de 274. De feito, é xunto con Madrid a zona onde máis parados de longa duración hai. Uns datos que, en todo caso, non cre o presidente da Xunta, Alberto Núñez Feijóo.
“Ou os datos do Eurostat están mal ou os da EPA sobre Galicia teñen menos ocupados”, ironizou ao ser preguntado por GC sobre estes dous estudos que se deron a coñecer este xoves e nos que o presidente galego tirou os datos que lle interesan. Así, do segundo, que apunta que en Galicia o desemprego está a subir en Galicia a un ritmo 9,2 veces o do Estado, acadando case a metade dos novos parados do Estado, Feijóo preferiu quedar co dato interanual e non co trimestral.
“Temos 33.000 persoas ocupadas máis que en marzo de 2015 e 47.8000 desempregados menos e menos paro que no primeiro trimestre de 2013. Se os datos sobre emprego evolucionaran deste xeito, firmaba inmediatamente”, indicou na rolda de prensa posterior ao Consello da Xunta. Feijóo insistiu en que Galicia é a 5ª autonomía na que máis baixou o paro e que hai 24 meses consecutivos de crecemento das afiliacións na Seguridade Social.
Pero, preguntado, sobre os datos do trimestre, que son moi negativos para Galicia, Feijóo volveu recuncar que, en todo caso, son os de menor incremento “da serie histórica” dos trimestres. “E isto acredita que non debemos pensar que sobe o paro, porque é todo o contrario”, suliñou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.