Por Galicia Confidencial | Ferrol | 29/04/2016 | Actualizada ás 10:53
O portavoz de ANOVA defende a continuidade da coalición de goberno en Ferrol. Xosé Manuel Beiras declarou este xoves, tras reunirse co edil Jorge Fernández, na capital departamental que cómpre por enriba o proxecto en común “fronte as diferencias que poidan existir entre as lecturas as veces discordantes entre o grupo socialista e o de Ferrol en Común”.
Este venres hai asemblea extraordinaria de Ferrol en Común. A orde do día inclúe como punto único a “Análise e Valoración do Pacto FeC-PSOE”. Os tira-puxas entre a marea e os socialistas foron subindo de volume nas últimas datas até ameazar a continuidade do pacto.
Beiras defende a continuidade e aplaudiu “a liña política seguida polo alcalde e Ferrol en Común, pero do conxunto do goberno, onde está tamén o PSOE”. É máis, o líder animou a súa ex-formación, o Bloque a sumarse ao Goberno. “Sería estupendo que todos os que se reivindican deste páis e de esquerda, tamén se sumen a apoiar, e isto vai polo BNG”, indicou.
O parlamentario volveu a mostrar un discurso a favor dos pactos. Para as autonómicas, insistiu en que cómpre reformular e ampliar En Marea. De cara as xerais de xuño, argumentou que cómpre transformar a coalición do 20D nun partido instrumental para evitar que Galicia volva a quedar sen grupo parlamentar no Congreso. Na súa opinión, a repetición dos comicios débese a que o liderado estatal do PSOE non tivo liberdade dabondo para artellar un pacto de esquerdas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.