Bascuas presentarase as primarias abertas de Compromiso
Tras a saída dos partidarios de sumarse ás mareas, a formación galeguista elixirá o seu candidato á presidencia da Xunta e os cabezas de lista provinciais por procedemento de primarias abertas a cidadanía, un proceso que comeza hoxe e culminará o 29 de maio.
Por Galicia Confidencial | Santiago | 30/04/2016 | Actualizada ás 16:18
O Consello Político Nacional de Compromiso por Galicia aprobou hoxe o seu regulamento para as primarias abertas á cidadanía para as vindeiras eleccións ao Parlamento de Galicia.
“Con isto abrimos xa o procedemento para elixir o noso candidato ou candidata á presidencia da Xunta, así como os cabezas de lista das outras tres circunscricións provinciais”, asegurou o secretario xeral de Compromiso por Galicia, Xoán Bascuas.
O proceso que se inicia hoxe rematará o día 29 de maio cunhas eleccións primarias abertas á cidadanía. “Convidamos a toda a cidadanía galega non só a votar senón tamén a presentarse como candidatos”, concluíu o secretario xeral de Compromiso.
O propio Bascuas confirmou que, salvo impedimento de última hora, considera que vai presentarse as primarias para ser cabeza de cartal á presidencia da Xunta. As primarias chegarán tras un profundo debate interno sobre coaligarse coas mareas.
A postura maioritaria de presentar unha candidatura propia nos comicios autonómicos provocou a saída de ducias de militantes, algúns deles moi relevantes como, entre outros, o ex-senador do BNG Pérez Bouza ou o candidato nas europeas, Paulo Carlos López.
