A candidata Pontón di que Galicia estivo ausente no Congreso
O BNG proclama a súa voceira como cabeza de cartel á Xunta. Pontón critica aos gobernos do PP e, sen nomeala, tamén a En Marea. A nacionalista asimila a coalición galega a Podemos.
Por Galicia Confidencial | Santiago | 30/04/2016 | Actualizada ás 20:35
Como estaba previsto, o BNG designou a Ana Pontón candidata á Presidencia da Xunta. A parlamentaria foi a única candidata que se presentou.
A nova voceira nacional aproveitou a proclamación para cargar tanto contra o PP como contra outras forzas opositoras. Ante o Consello Nacional, proclamou que asumía ese reto "coa firme convicción de que o Bloque representa a alternativa de presente e de futuro ante o desastre de gobernos da sen razón e sen corazón”.
“Feijóo e Rajoy son as dúas caras da mesma moeda, símbolos de gobernos ao servizo da recentralización e do grande capital, sen proxecto para Galiza e sen corazón”, denunciou Pontón. “Para ser alternativa política é fundamental ter proxecto e ideas, mais é imprescindíbel ter corazón e sentir como propios os problemas da xente”, recalcou a candidata nacionalista.
De cara á repetición das eleccións xerais, Pontón avanzou que o BNG “vai converter en oportunidade para Galiza o fracaso das forzas estatais, -vellas e novas-, en dar unha alternativa a Rajoy, converter a repetición das xerais nunha oportunidade para que Galiza recupere voz propia en Madrid”.
Sen nomealo directamente, Pontón criticou o fracaso de En Marea á hora de lograr o prometido grupo parlamentar galego. A xa candidata amosouse convencida de que os galegos e galegas “tomaron nota” dese fracaso e do “espectáculo” iniciado tras o 20D. “Tomaron nota de que Galiza quedou desaparecida nestes catro meses de paripé, teatro, roldas de prensa, xestos cara a galería, nos que os problemas do país non preocuparon, nin ocuparon a ningunha forza política do novo bipartidismo a catro”, declarou asimilando a En Marea con Podemos.
Nun esforzo de marcar diferencias coas confluencias dixo que “honestamente, o que precisamos é un proxecto político ca cabeza e co corazón aquí, que non teña que pedir permiso a ninguén de cando e como pode defender os nosos intereses, como sempre fixo o BNG tamén no Congreso”.
