Por Galicia Confidencial | Compostela | 02/05/2016 | Actualizada ás 12:17
Un deputado. Iso foi o que sacou Ciudadanos nas pasadas eleccións xerais do 20D. Sen embargo, o seu coordinador en Galicia, Manuel Pena, está convencido de que esta formación mellorará os resultados o 26 de xuño, cando se repitan, novamente, os comicios.
Pena está convenciddo de que a falta de acordo entre os grupos políticos para formar Goberno favorecerá C's. "Creo que imos ter mais representación nos comicios do 26 de xuño, xa que Ciudadanos é un partido en crecemento e tivemos catro meses máis para seguir asentándose en Galicia", apuntou.
Nunha entrevista no programa Galicia por Diante da Radio Galega, Pena insistiu en que Galicia debe converterse nunha "potencia social e política" dentro de España, pero non descarta, que nun momento de crise como o actual, algunhas "competencias" que actualmente ten o Goberno autonómico deberían recentralizarse.
Unha proposta que serviría, dixo, para controlar o gasto, e que deberían tamén chegar a outras Comunidades con problemas similares aos de Galicia, como o País Vasco ou Cantabria.
Ciudadanos conformou xa a súa estrutura orgánica en Galicia de forma que o comité territorial autonómico está integrado polo Delegado Territorial, Juan José Chouza; o portavoz do partido, Javier Sánchez Agostino, e os coordinadores da Coruña, Manuel Moinelo; Lugo, José Luís Durán; Ourense, Ernesto Rodríguez; e Pontevedra, Manuel Pena.
Tamén se procedeu á elección da súa xunta directiva, que está integrada por Manuel Pena, como Coordinador; Javier Sánchez Agostino, portavoz e comunicación; Ernesto Rodríguez, Acción Política; José Luís Durán, Secretaría, e Manuel Moinelo, Loxística.
Un equipo que, di, está "a preparar" o programa electoral para as próximas eleccións autonómicas, o cal pivotará sobre o obxectivo de pór "a Galicia no sitio que se merece".
Sen embargo, esta formación aínda non teñen candidato para as próximas eleccións autonómicas. Será designado mediante primarias nas que poderán votar os militantes da Comunidade para poder atopar ao "Albert Rivera" de Galicia, segundo Pena.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.