Noriega enmenda a Yolanda Díaz: “O propio proceso designará os candidatos”
O alcalde de Santiago insiste en que o proceso nas mareas é “colectivo” e que non lle toca a el, nin a outros dirixentes, poñer candidatos.
Por Galicia Confidencial | Compostela | 03/05/2016 | Actualizada ás 09:00
O alcalde de Santiago de Compostela e coportavoz de Anova, Martiño Noriega, saíu este luns ao paso das declaracións da lider de EU en Galicia, Yolanda Díaz, que se autodescartou como candidata á Presidencia da Xunta e tamén descartou ao líder de Anova, Xosé Manuel Beiras. “É o propio proceso o que debe de designar ao candidato de unidade popular”, suliñou.
"Non vou entrar no xogo de designar quen pode ou quen non pode participar porque entendo que ten que ser o propio proceso o que designe ao mellor candidato", destacou ao ser preguntado pola opinión de Díaz. "Paréceme que é unha opinión de Yolanda Díaz que eu respecto, aínda que penso que o proceso é o que ten que determinar quen van ser os candidatos”, insistiu.
“Estamos a falar dun proceso colectivo e, por tanto, aínda que soe moi metafórico, non me toca a min designar ou non quen pode ou quen non pode formar parte", indicou. "A todos tócanos desde a diversidade expor as nosas opcións políticas para unhas eleccións nas que eu creo que tan só hai dúas posibilidades, a continuidade do PP e do señor Feijóo como presidente ou un goberno liderado por unha candidatura de unidade popular, por unha marea", sinalou.
