As bases de Esquerda Unida dan un si rotundo á confluencia
Yolanda Díaz aplaude os resultados pero indica que agora cómpre desenvolver un programa común.
Por Galicia Confidencial | Santiago de Compostela | 05/05/2016 | Actualizada ás 15:09
As bases de Esquerda Unida aproban a alianza con Podemos para as próximas eleccións xerais. A luz verde chega tanto a nivel estatal -onde o si sumou máis do 84,4%- como a nivel galego -onde os partidarios da alianza rondan o 84,8% da militancia.
En Galicia, Esquerda Unida asegura que participaron máis de 400 persoas na consulta, cunha abstención ínfima, menor ao 3%. Votaron a prol 430 e en contra 62 militantes, mentres que se abstiveron 15.
A líder nacional en Galicia, Yolanda Díaz, mostrouse satisfeita cos resultados. A deputada avoga por seguir construíndo o “poder popular” pero admite que o punto clave é a elaboración do programa común.
A nivel galego, Díaz mostrouse optimista sobre o avance das negociacións con outros axentes, como ANOVA ou as mareas municipalistas, de cara a construcción dunha marea máis ampla.
