Cruce de camiños entre Podemos Galicia e PSOE
Podemos Galicia e o PSdeG viviron esta semana dous episodios onde as traxectorias de dúas dos seus dirixentes cruzáronse. En Santiago, unha concelleira socialista que podería entrar no municipio confesou que tamén milita en Podemos. Por outra banda, a nova secretaria de comunicación e estratexia do partido morado admitiu que traballou hai pouco para o PSdeG nun cargo público de libre designación.
Por Galicia Confidencial | Santiago de Compostela | 06/05/2016 | Actualizada ás 12:00
Celtia Traviesas deu detalladas explicacións do seu breve periplo como asesora de comunicación de Darío Campos, presidente da Deputación de Lugo.
Traviesas argumenta que “fala ben do presidente da Deputación de Lugo, Darío Campos, que por riba da miña proximidade a outro partido, que nunca ocultei, valorase o meu currículum e a miña profesionalidade para un posto de confianza como asesora de comunicación”. A continuación sinala que “levo máis de 10 anos traballando no que sae, loitando por gañarme a vida e por ter unha carreira profesional. Envexo a quen se pode permitir, ou tivo a sorte, de manter pulcros currículums de activistas; eu non”.
A secretaria explica nun “exercicio de transparencia” que só traballou no gabinete da Deputación “de finais de decembro de 2015 a comezos de febreiro de 2016”. A continuación di que atopou outro traballo de asesora, pero para unha eurodeputada de Podemos, polo que cambio de traballo. Traviesas rexeita as acusacións internas de que estivera “pensando noutro partido” e fai un chamamento á unidade.
Por outra banda, o PSOE de Santiago atopouse esta semana cunha desagradable sorpresa. Unha serie de renuncias persoais e incompatiblidades profesionais fai que teña que correr un posto de concelleiro até o número seis da lista. Resulta que ese posto é de Beatriz Estevez, quen recoñeceu publicamente que ten doble militancia, nos socialistas e en Podemos. De feito, foi membro da Comisión de Garantías das últimas primarias de Podemos Galicia.
Loxicamente, o PSOE de Santiago non vai estar cómodo cunha concelleira que tamén milita noutro partido, que neste caso forma parte da coalción de goberno, Compostela Aberta. Cederá o posto que lle corresponde por Lei Estévez? Polo de agora deixou a porta aberta a asumir a acta de concelleira e alegou que os partidos non entenden que as súas bases poidan colaborar coas bases doutras formacións.
