O Sergas reforza a atención aos pacientes oncolóxicos mediante un convenio con AECC Ferrol

O Servizo Galego de Saúde e a Asociación Española contra o Cancro (AECC) de Ferrol estableceron un novo marco de colaboración co obxectivo de mellorar o benestar das persoas diagnosticadas con cancro e das súas familias. O convenio permitirá a posta en marcha de programas de voluntariado na área sanitaria de Ferrol, orientados ao acompañamento e apoio emocional e práctico aos afectados.

A iniciativa foi presentada nunha reunión entre o conselleiro de Sanidade, Antonio Gómez Caamaño, e representantes da AECC local, a súa presidenta Isabel Estevan e a vicepresidenta Mabel Sanesteban. No encontro, segundo informou a Xunta, abordouse a implementación de accións que permitan consolidar unha rede estable de acompañamento a pacientes oncolóxicos desde o momento do diagnóstico.

Entre as tarefas que desenvolverán as persoas voluntarias inclúese axudar a comprender e asimilar a información médica, apoiar na realización de xestións administrativas e aliviar a carga emocional dos coidadores. Desta forma, preténdese facilitar o descanso físico e mental das familias, así como reforzar a atención integral ao doente.

O conselleiro destacou que esta colaboración exemplifica a aposta da sanidade pública por "un modelo máis humano e próximo", no que a atención non se limite ao ámbito clínico, senón que abranga tamén o acompañamento psicosocial.

O convenio forma parte das medidas que o Sergas está a desenvolver para fortalecer a atención oncolóxica, en coordinación con organizacións sociais que dispoñen de experiencia no acompañamento a persoas en situacións de vulnerabilidade. O acordo xa está operativo e prevese que as primeiras accións comecen a aplicarse nas próximas semanas na área ferrolá.