A Xustiza dálle a razón a Queremos Galego tres anos despois
Queremos Galego gaña o recurso xudicial contra as sancións que lle impuxo o Goberno do PP en Santiago pola manifestación do 17 de maio de 2013.
Por Galicia Confidencial | Compostela | 11/05/2016 | Actualizada ás 20:20
A plataforma Queremos Galego informou de que gañou o recurso contra a sanción imposta por supostos incidentes acontecidos na manifestación do 17 de maio de 2013 con motivo do Día das Letras Galegas, e "tras a negativa a retiralas" por parte da Delegación do Goberno e o Ministerio do Interior.
Nun comunicado, o voceiro de Queremos Galego e presidente da Mesa pola Normalización Lingüística, Marcos Maceira, sinala que houbo unha "denuncia por parte da Policía e da Delegación do Goberno" que "só se entende dende o uso político das institucións a favor dos intereses do PP", que entón estaba á fronte do Concello de Santiago, Xunta e Goberno central.
Para a plataforma, esta "manipulación das institucións" xa "fora explicitar" por parte do PP coa "negativa municipal a permitir a colocación dun palco ou megafonía", o que foi recorrido no xulgado por Queremos Galego, ou coa modificación "sen tempo" do percorrido notificado á Delegación do Goberno, "co obxectivo de obstaculizar a reivindicación a favor da lingua", denuncia.
"A negativa de Queremos Galego a ceder nas presións do PP para que a manifestación non se celebrase foi o motivo real da multa", recriminou a plataforma, que asegura que "non se trata de feitos illados", senón que se sucederon noutras ocasións.
Marcos Maceira esperou que "feitos como estes non se volvan repetir" e chamou a participar na manifestación do próximo día 17, que sairá ás 12,00 da Alameda de Santiago. O voceiro da plataforma defendeu a necesidade de "volver saír un ano máis á rúa para defender a lingua galega como elemento de unión e para garantir a convivencia en condicións de igualdade dentro do pobo e nas relacións con outros pobos".
