Ferido grave un mozo tras unha descarga eléctrica en Vilagarcía
Foi derivado á unidade de queimados do Hospital da Coruña.
Por Europa Press / Redacción | SANTIAGO DE COMPOSTELA | 13/05/2025 | Actualizada ás 21:44
Un mozo de 22 anos resultou ferido de gravidade con queimaduras por unha descarga eléctrica sufrida en Vilagarcía de Arousa e pola que está ingresado na Coruña. Segundo informan a Europa Press fontes do 061 e dos servizos de emerxencias, ocorreu na mañá deste martes. Nun primeiro momento, servizos de Urxencias Sanitarias trasladárono desde o punto de atención continuada (PAC) ao Hospital do Salnés, en Vilagarcía.
Máis tarde, sobre as 14.00 horas, o mozo tivo que ser derivado ao Complexo Hospitalario Universitario da Coruña (Chuac), onde permanece ingresado na unidade de queimados. Para o traslado, o 061 empregou o helicóptero medicalizado con base en Santiago de Compostela.
