Rueda culpa ao Goberno de que o dragado do Lérez aínda non se fixese: "Que se nos diga dunha vez onde verter os lodos"
"Son millóns de euros que a Xunta está disposta a investir porque creo que é un investimento que convén, necesario, pero non podemos actuar mentres non teñamos eses permisos e indicacións, que pido que veñan canto antes", concluíu o presidente da Xunta.
Por Europa Press / Redacción | PONTEVEDRA | 20/05/2025 | Actualizada ás 14:43
O presidente da Xunta, Alfonso Rueda, manifestou que ao seu Executivo gustaríalle que o dragado do Lérez se levase a cabo canto antes e apuntou ao Goberno: "Que se nos diga xa dunha vez, levamos anos esperando, cal é o punto de vertedura adecuada e pornos a traballar canto antes".
En declaracións aos medios, Rueda destacou que el é de Pontevedra e que lembra "cando o Lérez estaba doutra maneira". "A min gustaríame, como a moitísimos pontevedreses, volver a esa situación. Fai falta un dragado e iso implica un esforzo económico importante que a Xunta está disposta a facer, pero implica retirar uns lodos e o que alí impide que esa zona sexa navegable, como o era hai moitos anos", reflexionou.
"Necesitamos que se nos diga canto antes onde se poden verter eses lodos. Levamos anos esperando e o Ministerio díxonos que era necesario un informe dun organismo do mesmo que analiza e determina este tipo de cuestións. Está emitido e agora ten que ratificalo o propio Ministerio", agregou. Nesta conxuntura, o presidente galego apelou a que esa ratificación "veña canto antes" e se traslade "cal é o punto de vertedura axeitado" para poder "empezar" o máis pronto posible.
"Son millóns de euros que a Xunta está disposta a investir porque creo que é un investimento que convén, necesario, pero non podemos actuar mentres non teñamos eses permisos e indicacións, que pido que veñan canto antes", concluíu Rueda, convencido de que os veciños e veciñas de Pontevedra "non queren pelexas" entre administracións, senón que o dragado se leve a cabo "canto antes".
