Por Galicia Confidencial | Santiago | 20/05/2016 | Actualizada ás 19:19
O resultado será comunicado á Mesa de Coordinación de En Marea para "seguir co camiño marcado cara ás eleccións ás Cortes do Estado do 26 de xuño".
Precisamente, a Xunta Electoral Central deu luz verde este venres á coalición En Marea para as próximas eleccións xerais, que se rexerá por un acordo político igual ao dos comicios do 20 de decembro.
As preguntas incluídas na consulta interna permitiron que as bases de Anova mostraran a súa preferencia por concorrer como partido instrumental (un 79,9%), como así aprobouno nos documentos da súa conferencia política do 10 de abril, na que se apostou por defender que En Marea camiñase cara á súa conversión nun partido instrumental de adscrición individual para as citas electorais.
Non obstante, Podemos Galicia e Esquerda Unida opuxéronse á vía do partido para a repetición das xerais, senón por manter os acordos alcanzados para o 20 de decembro.
Na asemblea de En Marea do pasado domingo día 15, houbo tamén voces, entre elas de militantes de Anova, que apostaron pola fórmula do partido instrumental para concorrer ás eleccións xerais, xa que a formación nacionalista considera que é o xeito xurídico que podería garantir a consecución do grupo parlamentario propio para Galicia no caso de que, polo menos, se repitan resultados -seis deputados no Congreso e o mínimo porcentual en todas as circunscricións-.
Non obstante, aínda que Podemos -mesmo así a chegou a pronunciar a propia número tres da dirección estatal, Carolina Bescansa- e Esquerda Unida ratificaron o seu compromiso de buscar grupo parlamentario para Galicia, estas dúas formacións han asegurado que a clave está en contar cunha maioría diferente na Mesa do Congreso dos Deputados para logralo, e non na cuestión xurídica.
Neste escenario, Anova, como fixeron os seus socios da coalición a semana pasada, someteu á militancia os acordos políticos, se ben En Marea xa foi rexistrada como coalición o pasado venres día 13 (co acordo do mesmo documento político) e obtivo este venres luz verde. En todo caso, membros de En Marea ligados a Encontro Cidadá por unha Marea Galega e a Compostela Aberta tamén iniciaran os trámites ante o Ministerio do Interior para rexistrar esta marca como partido político, fórmula que finalmente non se utilizará.
Concretamente, a primeira das preguntas que respondeu a militancia de Anova é a seguinte: "¿Que fórmula xurídica consideras que sería a máis apropiada para garantir os obxectivos políticos de En Marea de cara ao 26 J?: a) Coalición b) Partido instrumental". O resultado, segundo os datos difundidos pola formación que lidera Xosé Manuel Beiras, foi do 14,5 a favor de coalición, 79,9%, por partido instrumental e 5,6%, abstención.
Esta primeira parte permitiu á militancia de Anova decantarse pola fórmula xurídica que defende tanto a dirección como a que recollen os documentos aprobados na asemblea celebrada o pasado mes de abril na Coruña.
A segunda pregunta dicía como segue: "Pensas que Anova debe participar nos comicios ás Cortes Españolas en En Marea, independentemente da fórmula xurídica expresada por nós, salvagardando o espazo de unidade popular?: a) Si b) No". O resultado foi un si, nun 75,57%; o non obtivo o 15,78% e o 8,65% optou por absterse.
Con esta segunda parte da consulta, na que participou o 68% da militancia de Anova, a participación máis numerosa das consultas telemáticas que fixo a organización, as bases da formación nacionalista tiveron a ocasión de manter o seu apoio á coalición En Marea para os comicios do 26 de xuño sen que iso supoña retractarse da súa preferencia por un partido instrumental.
Preguntado en rolda de prensa, o alcalde de Santiago e covoceiro de Anova (faceta que deixou nun segundo plano tras a súa candidatura municipal), Martiño Noriega, reivindicou que a súa formación política sometera a consulta interna os acordos. "¡Claro que votei!, moléstame máis cando non me deixan votar!", manifestou.
En canto á diferenza entre a fórmula catalá (partido e coalición de partidos) e a coalición de En Marea, Noriega asegurou que "fórmula catalá non solucionaría o debate" de Galicia, polos escanos que podería obter En Comú con respecto aos que se obtería por parte de Anova só, e polo tanto considerou que a situación "non é extrapolable".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.