Por Galicia Confidencial | A Coruña | 25/05/2016 | Actualizada ás 14:20
A tensión que se vive no PSdeG pola celebración das Primarias para a elección do vindeiro candidato á Xunta é máxima. Tanta, que xa hai rumores de falsificacións de avais. Uns rumores que saltaron na mañá deste mércores e que, pouco despois, eran aclarados.
Así, o ex deputado no Congreso pola Coruña, Ricardo García Mira, publicaba nas súas redes sociais un comentario no que criticaba que alguén asinara por el como avalista dun candidato que non era o seu o que invalidaba o seu aval ao apoiar el a outro dos candidatos. “Estas prácticas resultan ben desagradables e flaco favor lle fan aos candidatos e mais ao proceso no seu conxunto”, escribía no seu Facebook. Un comentario que retiraría con posterioridade.
Pouco despois era a responsable da agrupación socialista da Coruña, da que é membro García Mira, Mar Barcón, a que tamén publicaba outro comentario nas redes sociais. Anunciaba que acababa de remitir un correo á Comisión de Garantías do PSdeG para investigar a suposta usurpación de identidades e aclarar o feito. Un correo que tamén remitiu aos dous candidatos e aos seus representantes legais.
“Desde luego es intolerable y como secretaria xeral de la Agrupación Socialista Coruñesa no puedo ni quiero dejar pasar la mínima sombra sobre un proceso que debería hacernos sentir a todos orgullosos y que no puede verse empañado por este tipo de actuaciones”, salientaba Barcón.
Ricardo García Mira aclaraba máis tarde a Galicia Confidencial que xa se solucionara o enredo e que un militante o chamara para pedirlle desculpas porque firmara por el pensando que avalaba ao candidato Méndez Romeu. “Non lle quero dar máis importancia, aínda que esas prácticas non se deben facer”, apuntaba.
“As eleccións son difíciles, sobre todo, cando hai candidatos como Leiceaga, Méndez Romeu ou Caballero. Pero cando un avala un candidato só pode avalar a un”, engadía ao quitarlle transcendencia ao acontecido.
Ademais, e a pesar das críticas, destacaba que a súa posición como deputado “é igual que a de calquera outro afiliado” e que, a pesar de que apoie a Xaquín Fernández Leiceaga neste proceso, o seu candidato a Xunta será “o que o partido e os afiliados decidan”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.