Por Galicia Confidencial | Santiago de Compostela | 26/05/2016 | Actualizada ás 14:48
Abel Caballero cualificou en repetidas ocasións como “moi malos” a Martiño Noriega e Xulio Ferreiro. O alcalde de Vigo chegounos a cualificar de “calamidade” e mesmo dixo que se alegran cando o edil olívico se dedica a criticalos.
O líder socialista vigués argumentou que en Galicia hai poucos consensos pero un deles, asegura, é que os alcaldes das mareas son pésimos.
Non é a primeira vez que Caballero arremete contra os edís das confluencias dos que aseguran viven illados da realidade. O significativo é que hoxe fíxoo a poucos días das primarias nun claro mensaxe para demostrar que o seu bando non está disposto a pactar cos alcaldes das coalicións. Fíxoo, ademais, nun acto electoral de apoio a José Luís Méndez Romeu.
O líder vigués tamén aplaudiu a Francisco Caamaño. O ex-ministro de Xustiza sumouse hoxe publicamente ao bando de Méndez Romeu. O político asegura que os dous candidatos nas primarias son válidos, pero argumenta que os apoios de Xaquín Fernández Leiceaga son os que levaron ao PSdeG a ser incapaz, di, de incorporar novas persoas e marxinar outras coma el.
"A maioría dos apoios do candidato Leiceaga responden a un conxunto de persoas que levaron ao Partido Socialista á situación na que se atopa, un conxunto de persoas incapaces de facer un proxecto creativo, ilusionante para esta sociedade e, sobre todo, de engadir persoas ao proxecto, máis ben foron quen de excluilas, e algún exemplo directo agora mesmo se pode ver de quen está a falar", declarou Caamaño.
Unha visión que contrapuxo "cun sector amplo" que representa a candidatura de Méndez Romeu, que "é onde está a xente con experiencia institucional, exministros, o grupo parlamentario, alcaldes". Por iso, cre que "o que hai que facer é primeiro estar unidos e despois traballar pola sociedade galega".
Caballero gabou a Caamaño e destacou que a súa opinión é moi importante a nivel cualititativo dentro do PSdeG.
Co acto público esta mañá en Santiago canda o ex-ministro e o principal alcalde socialista de Galicia, Méndez Romeu anótase un claro tanto para as primarias. O seu rival Xaquín Fernández Leiceaga respondeu argumentando que boa parte dos apoios que ten o portavoz parlamentario son persoas que no seu día apoiaron a Caamaño no seu fracasado intento de liderar o PSdeG na Coruña e en Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.