Por Galicia Confidencial | Verín | 27/05/2016 | Actualizada ás 10:00
A Mesa Intersindical de Bombeiros de Galicia denunciou a creación dunha “figura inédita e innecesaria” ata agora no Consorcio Provincial de Bombeiros. Trátase do posto de vicexerente que foi dado, di, “de xeito dixital”, ao alcalde de Laza, o popular José Manuel Barreal.
Nun comunicado, esta entidade di que o candidato non tivo que superar ningún proceso selectivo. “Convén saber, que a persoa que encarna dito cargo, ata agora era xerente dos Consorcios de Verín e a Limia, resultando tamén ser o alcalde popular do Concello de Laza, e que no seu día foi nomeado como persoal eventual de confianza e asesoramento especial e que segundo parece, obtén a condición de persoal indefinido por sentenza (non firme) dun Tribunal do Social”, apunta.
Por iso, denuncia que esta designación “dixital” contravén a xurisprudencia do Tribunal Supremo que esixe que unha praza de tales características sexa cuberta atendendo ós principios de igualdade, capacidade e mérito consagrados no ordenamento xurídico. E lembra que tal extremo era coñecido pola Xunta de Galicia e a Deputación Provincial de Ourense dende o momento en que en xaneiro de 2015 un bombeiro de Verín presentou alegacións ós estatutos do Consorcio.
“É a partir deste momento cando se produce unha denuncia no ámbito laboral por parte do xerente comarcal de Verín e a Limia, alcalde de Laza, que remata cunha sentenza non recorrida polo Consorcio na que se obriga á readmisión ou indemnización de quen, recordemos, foi nomeado a dedo”, engade a Mesa Intersindical.
Así, suliña que, “contra toda lóxica tanto Xunta de Galicia como Deputación Provincial de Ourense”, acordaron a readmisión do denunciante creando a primeira vicexerencia que se coñece en todos os Consorcios de Bombeiros de España. Trátase dun posto que non ten definida ningunha función nos estatutos pero que si ten definido un salario bruto por enriba dos 45.000€/ano. “A maiores leva aparellado outra serie de gastos en vehículos oficiais, dietas”, apunta.
“Coidamos que non existe argumento técnico nin económico que poida avalar o mantemento dunha praza que se podería amortizar economicamente en menos de dous exercicios (debido ao importe que suporía a indemnización) sendo a decisión de readmisión arbitraria e contraria ós intereses do común”, conclúe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.