Por Galicia Confidencial | Bruxelas | 01/06/2016 | Actualizada ás 17:47
O coordinador da área internacional da Mesa Pola Normalización Lingüística, Paulo Filgueiras, interveu este mércores no Parlamento Europeo no marco da audiencia sobre discriminacións lingüísticas na UE organizada pola Rede Europea para a Igualdade das Linguas, en colaboración cos grupos parlamentares da Alianza Libre Europea- Os verdes –grupo onde está o BNG-- , e a Esquerda unitaria Europea –onde están AGE-Europa--.
Filgueiras denunciou o incumprimento da Carta Europea das Linguas e presentou casos reais reflectidos na memoria da liña do galego dos anos 2015 e 2016. Estas denuncias inclúen casos de discriminacións diante de empresas ou organismos públicos e tamén a política lingüística da actual Xunta de Galicia, nomeadamente as consecuencias do decreto contra o galego de 2010.
A Mesa expuxo tamén a situación creada pola sentenza do TSXG contra a ordenanza a favor do galego do concello de Lugo. “Obrígannos a prescindir do noso idioma para acceder a servizos básicos”, sinalou o membro da Comisión Permanente da entidade en defensa do galego, para destacar que “en moitas ocasións é o propio goberno galego, quen ten a obriga de nos protexer, que agride os nosos dereitos”.
Ademais, Filgueiras expuxo casos de vulneración de dereitos e discriminación lingüística como a humillación a unha nena de dez anos por falar galego, por parte do centro Hípico Casas Novas cando participaba nun campamento de verán; a prohibición por parte do centro infantil Jungle World do uso da galego nas súas instalacións; ou os casos de denegación de atención por razóns lingüísticas por parte da Policía ou da Garda Civil.
Recomendacións
Na audiencia denunciáronse casos de vulneración dos dereitos lingüísticos como dereitos fundamentais, e sinalouse a discriminación por razón de lingua como unha forma de racismo. Avaliouse tamén o tratamento que a UE e os seus Estados membros dan ao problema da discriminación e exclusión das linguas propias.
Como resultado desta xornada elaboraranse recomendacións sobre as medidas que a UE debe tomar ao respecto, incluíndo o sinalado polo Consello de Europa, por medio da Comisión Europea contra o racismo e a intolerancia, de que a discriminación lingüística constitúe unha forma de racismo.
A conferencia conta coa participación xunto á Mesa, de diversas entidades de defensa das linguas propias da Bretaña, Cataluña, Irlanda, País Vasco, Gales, Húngaros de Eslovenia e Romanía, e Occitania.
Conta tamén coa participación do Consello de Europa (Carta Europea das Linguas e Convención das Minorías Nacionais), Alto Comisionado para as Minorías Nacionais da OSCE, e o Alto Comisionado de Dereitos Humanos da ONU. Nesta sesión tamén estiveron presentes Ana Miranda, do BNG, e Lidia Senra, de AGE-Europa. O eurodeputado socialista José Blanco anunciara tamén a súa participación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.