“Ágora”: o Consello da Cultura Galega estrea pódcast

As conferencias do Consello da Cultura poderán escoitarse a través da colección 'Ágora', que estará dispoñible na propia web do organismo e as plataformas Spotify e Ivoox. As charlas sobre temas de historia, ciencia, arte ou literatura, entre unha ducia de categorías, corren a cargo de especialistas como: William Shea, Michel Maffesoli, Xosé M. Núñez Seixas, Darío Villanueva, Isabel Burdiel, Xusto Beramendi, Jorge Mira, Henar Galego ou Ramón Villares.

Nun comunicado, o Consello da Cultura Galega explica a necesidade de ofertar estes contidos en galego "en consonancia co que están a facer outras entidades culturais europeas". 'Galicia e a División Azul', de Xosé Manuel Núñez Seixas; 'A formación do Reino Suevo', de Anselmo López Carreira; ou 'As biografías dende a perspectiva da historiadora', de Isabel Burdiel, son algúns dos exemplos que se poderán escoitar.

Tamén estará dispoñible a recreación da 'Alba de Gloria' que Castelao pronunciou en Bos aires o 25 de xullo de 1948, ademais de dúas ficcións: 'A Camisa', adaptación de Perico Asorey (Quinta do Cuadrante) dunha peza dramática de Loureiro Olmo (1922-1994) sobre a emigración dunha familia a Madrid; e 'A Lindona de Galicia', peza teatral do século XVII do autor murciano Andrés de Claramonte que conta unha historia de enredo entre Lindona e o rei García --adaptación tamén de Perico Asorey--.

Novo pódcast con conferencias do Consello da Cultura Galega. CCG | Fonte: Europa Press