A gandaría e a viticultura en Galicia: dous sectores cos prezos moi baixos

O Sindicato Labrego Galego (SLG) urxe ao Observatorio do Sector Lácteo de Galicia actuacións "inmediatas" a menos de 15 días de que entren en vigor novos contratos de granxas produtoras o 1 de agosto. Nun comunicado, o SLG mostra a súa "sorpresa" por que o Observatorio Lácteo non vaia a reunirse ata setembro, cando xa estean en vigor os novos contratos, ademais de que "non se fixeron públicos os datos dos custos de produción".

Así, reclama que haxa contratos á alza con subidas "considerables" de prezos, xa que lembra que o prezo medio en Europa "é moi superior" ao de Galicia. Remarca que o prezo medio que se paga en Galicia, segundo os últimos datos de maio, é de 48,8 céntimos por litro, "a cifra máis baixa de todo o Estado", mentres noutras autonomías supéranse os 50 céntimos. E isto ocorre a pesar de ser a comunidade co maior volume.

"Somos a comunidade do Estado español que menos cobra o prezo do leite, e dentro das rexións produtoras europeas somos das que menos cobra, e aínda por riba o diferencial de prezos que hai entre as nosas granxas máis pequenas e nosas máis grandes supera o oito céntimos", denuncia o coordinador do Sector Lácteo no Sindicato Labrego, Xulio Fernández.

"Galicia é quen tira polo prezo medio do Estado para abaixo. A media do Estado non alcanza a outros Estados de Europa que podía ser semellante porque á rexión que máis produce estáselle pagando moitísimo menos", censura.

UNIÓNS AGRARIAS RECLAMA UN ESTUDO DE CUSTOS PARA A VITICULTURA GALEGA

Unións Agrarias (UU.AA.) reclama á Xunta que realice ou encargue un estudo de custos para a viticultura galega, a pouco máis dun mes de que arrinque a vendima nalgunhas zonas de Galicia. Coa vista posta neste horizonte, o sindicato rexeita que as industrias teñan a "tentación" de "xogar cos prezos á baixa" polos aranceis de Estados Unidos.

En rolda de prensa, a organización agraria lembrou que "por lei" debe existir "un contrato cun prezo" antes de que as industrias recollan a uva aos produtores. Ademais, advertiu de que "non poden quedar uvas colgadas", como ocorreu o ano pasado con 350 viticultores da Ribeira Sacra, segundo os seus datos.

Unións tamén advertiu de que "denunciará" ante a Axencia de Información e Control Alimentarios (AICA) calquera intento de "banalizar" este traballo, despois de reivindicar a "importancia" dun sector que fixa poboación, serve como "xestor do territorio" ao manter superficie coidada e xera uns 400 millóns de euros de valor.