Estes serán os actos políticos do 25 de xullo, Día de Galicia: da manifestación do BNG á ofrenda do PSdeG en Rianxo

Un ano máis a manifestación que o BNG convoca na capital galega ás 12.00 horas e a ofrenda que o PSdeG realiza en Rianxo ante a estatua de Castelao concentrarán os actos das principais forzas da oposición o 25 de xullo, Día Nacional de Galicia. Mentres, o PPdeG terá o seu acto central na Fervenza do Toxa, no municipio pontevedrés de Silleda, onde porán en valor a "Galicia verde" e reivindicarán a "Galicia do 'si'".

Ademais, o presidente da Xunta, Alfonso Rueda, acudirá á Ofrenda ao Apóstolo como delegado rexio e o día anterior, o 24, entregará as Medallas de Ouro de Galicia aos alcaldes do Porto e de Braga no acto institucional da Administración autonómica. Así, como cada ano, o BNG realizará en Santiago a manifestación polo 'Día da Patria', con inicio na Alameda compostelá e final na Praza da Quintana. Baixo o lema 'Galiza Sempre, unha nación en marcha pola súa soberanía', os nacionalistas galegos marcharán este 25 de xullo nun acto que cualificaron como "a expresión da vontade do pobo galego para avanzar cara a un marco político no que Galicia exerza plenamente os seus dereitos".

Na presentación da campaña, que inclúe cartel coa figura de Castelao e unha protesta contra Altri como protagonistas, a responsable da área de Comunicación do BNG, Olalla Rodil, e a secretaria xeral da Organización, Lucía López, detallaron que se sitúa nun contexto de "deterioración social e económica", marcado pola "perda de poboación, a precarización da vida e a agresión constante aos recursos naturais e ao territorio". "Un modelo imposto polo PP na Xunta que actúa como axente comercial das grandes multinacionais, entregando o país a intereses alleos", subliñaba López, que tamén fixo referencia ao "espolio eólico, á ameaza da macrocelulosa de Altri ou á posible reapertura da mina de Touro-O Pino" como exemplos de "unha política ao servizo do negocio duns poucos".

OFRENDA A CASTELAO

Pola súa banda, os socialistas galegos repetirán en Rianxo a súa tradicional ofrenda a Castelao ante a estatua do intelectual galego que se erixe no seu pobo natal, nun acto no que estarán presentes os cargos institucionais e orgánicos da institución, co secretario xeral, José Ramón Gómez Besteiro, á cabeza. Segundo destacaron fontes do PSdeG consultadas por Europa Press, alí aproveitasen para reivindicar, entre outras cousas, "máis e mellores recursos" para Galicia e para mostrar unha "defensa dos servizos públicos". Tamén reclamarán un financiamento singular que garanta "máis e mellores recursos" para Galicia, que bonifique as condicións de envellecemento e dispersión e tamén de perda de poboación, en contraposición cun presidente do PPdeG que "dá a calada por resposta". Outra das reivindicacións do PSdeG neste 25 de xullo será demandar un financiamento "máis xusto" para os concellos fronte a un PP que "os está afogando".

PPDEG, EN SILLEDA

Mentres, os populares terán o seu acto central deste 25 de xullo na Fervenza do Toxa, na localidade pontevedresa de Silleda. Alí, ademais de pór en valor a "Galicia verde", os populares galegos reivindicarán a "Galicia do 'si'" que, tal e como destacaron fontes do PPdeG, "coincide coa Galicia que desexa a maioría dos galegos e a única que apunta cara ao futuro". Así mesmo, detallaron que destacarán que a Comunidade galega, "liderada polo PPdeG e por Alfonso Rueda", atópase "no camiño correcto", na procura "do benestar dos galegos e das galegas". "Estamos convencidos de que coa Galicia do 'si' temos moito que gañar, fronte aos do 'non' a todo e o continuo bloqueo a calquera avance", subliñaron os populares. Ademais do acto en Silleda, o PPdeG tamén porá en marcha unha campaña en redes sociais con motivo desta festividade.