Medio Lugo novo

“Tralas valoracións realizadas por parte da Dirección Deportiva e dos responsables técnicos”, o CD Lugo anunciou este martes que non renovará a ningún dos oito xogadores que rematan contrato a 30 de xuño. Á xa anunciada marcha de David Ferreiro e David López, súmanse agora Jonathan Pereira, Pau Cendrós, Israel Puerto, David de Coz, Fernando Vega e Abel Molinero.
Tampouco seguirá Sergio Marcos, tras rematar o contrato dunha tempada cedido polo Vilarreal.

Trala chegada de Luis César como novo técnico e de Emilio de Dios como director deportivo, ningún dos oito xogadores que acaban a súa vinculación co club lucense recibirán oferta de renovación, entre eles o dianteiro Jonathan Pereira, segundo máximo goleador do equipo con 9 goles a pasada campaña. O vigués conta con varias ofertas e podería reclar no Almería. Pereira, Cendrós, Molinero e Vega chegaron ao equipo no verán do 2015, mentres que Israel Puerto, David Ferreiro, David de Coz e David López xa proviñan da etapa de Quique Setién.

Malia as nove saídas anunciadas, o club lucense mantén o núcleo duro do plantel, con trece xogadores con contrato en vigor. Así, continúan os porteiros Xosé Xoan e RobertoFernández; os defensas Carlos Hernández, Dealbert, Manu e Álvaro Lemos; os medios Carlos Pita, Seoane, Campillo, Iriome e Igor Martínez; e os dianteiros Pablo Caballero e Joselu. Ademáis, o técnico arousán xa anunciou a súa intención de non contar cun plantel demasiado longo, para evitar ter xogadores descontentos polos poucos minutos no céspede.