Houbo celtas ou non en Galicia?
O arqueólogo Fernando Acuña Castroviejo asegura que en Galicia non se pode dicir que "houbo unha poboación celta".
Por Galicia Confidencial | Compostela | 24/06/2016 | Actualizada ás 12:00
“O celtismo tivo o seu papel no pasado como sinal de identidade. Non ten sentido falar de castro celta e sabemos que hai epigrafía de orixe céltica pero o concepto actual é diferente. É o da Europa Atlántica”. Así de rotundo se amosa o catedrático de Arqueoloxía Fernando Acuña Castroviejo nunha entrevista na web Historia de Galicia.
“Non podemos dicir que hai unha poboación celta. Iso respondeu a un tempo determinado e hoxe en día as circunstancias son diferentes”, suliña este investigador e profesor na USC durante 47 anos. Ademais, critica a falta de implicación das administracións nas escavacións o que está levando, di, a que agora se fagan “pequenas intervencións en cada castro e iso non dá coñecemento suficiente”.
Con todo é optimista sobre o futuro arqueolóxico galego e, sobre todo, coas novas fornadas de investigadores. “Hoxe progresa moito a investigación a pesar dos problemas económicos e das trabas administrativas”, suliña. Podes ler toda a entrevista en HdG.
