Un Deportivo... da Coruña
A Federación de Peñas do Deportivo e outros colectivos de afeccionados piden ao club que adapte o seu nome ao galego. “Pedimos, non máis, que o Dépor sexa por fin da Coruña”, remata o seu comunicado. Comezarán unha recollida de firmas para apoiar a súa reclamación.
Por gcdeportes | A Coruña | 25/06/2016 | Actualizada ás 09:32
Para que o Dépor sexa por fin da Coruña. Unha vella reivindicación que volve coller forza. A Federación de Peñas do Deportivo, xunto con outros colectivos deportivistas, reclaman que o RC Deportivo adapte o seu nome oficial ao galego e pase a chamarse Deportivo da Coruña, no canto do actual Deportivo de La Coruña.
“Pedimos, non máis, que o Deportivo sexa da súa cidade: A Coruña, e que o galego gañe usos e espazos na vida do noso Club. Facémolo como coruñeses, facémolo como galegos, pero facémolo sobre todo como deportivistas. É tempo de camiñar cos tempos. Coa nosa unión, Forza Dépor”, remata o comunicado asinado pola Federación de Peñas, Old Faces e Riazor Blues, colectivos que comezarán axiña unha recollida de firmas entre o deportivismo para apoiar a súa reivindicación.
“E é que o idioma de Galicia confúndese coas cores deportivistas, somos todo un. Por iso, por intelixencia e por sentimento, temos que, colectivamente, empurrar o Deportivo a dar o paso, a vencer clichés pasados de moda, que poden ofrecer a imaxe dun club elitista e arcaico, afastado da sociedade que non se corresponde coa relidade da familia deportivista. Temos que, coa nosa unión, facer normal no deportivismo o que é normal na rúa, na empresa, na administración ou nos medios de comunicación: oficialmente, e por acordo do Congreso dos Deputados dende 1998, a nosa cidade ten un nome: A Coruña”, argumentan os afeccionados deportivistas no seu escrito, que leva por título ‘Eu apoio que o Deportivo sexa da Coruña’.
Os seareiros branquiazuis recoñecen os pasos dados “tímidamente” dende o club no uso do galego, tanto nas campañas publicitarias como na megafonía do estadio, “e non pasou absolutamente nada, nada malo”. E por iso reclaman agora un paso máis do seu club, “a institución máis representativa da Coruña” o “emblema da sociedade civil coruñesa”, pero tamén “por vocación e traxectoria, o grande equipo de Galicia”, sosteñen no seu comunicado para solicitar por fin un Deportivo da Coruña.
